బిట్రగుంట రైల్వే స్టేషన్‌లో ప‌ట్టాలు త‌ప్పిన గూడ్స్ రైలు... ప‌లు రైళ్ల‌కు తీవ్ర అంత‌రాయం..

ఇటీవ‌ల దేశంలో రైలు ప్ర‌మాదాలు ఎక్కువ‌గా పెరిగిపోయాయి. దీంతో రైల్లో ప్ర‌యాణించాలంటేనే చాలామంది ఆలోచిస్తున్నారు. కానీ, త‌ప్ప‌నిస‌రి ప‌రిస్థితిల్లో సూదూర ప్రాంతాలకు వెళ్లాల్సిన వారు రైలు ప్ర‌యాణాల‌నే ఎంపిక చేసుకుంటున్నారు. దేశంలో ఇప్ప‌టివ‌ర‌కూ ఎన్నో రైలు ప్ర‌మాదాలు జ‌రిగినా, వాటి నివార‌ణ‌కు మాత్రం అధికారులు త‌గు చ‌ర్య‌లు తీసుకోక‌పోవ‌డం గ‌మ‌నార్హం.

ఇప్పుడు తాజాగా, నెల్లురూ జిల్లాలో ఓ గూడ్స్ ట్రైన్ ప‌ట్టాలు త‌ప్పింది. నేటి తెల్ల‌వారుజామున ఐదు గంట‌ల స‌మ‌యంలో బిట్రగుంట రైల్వే స్టేషన్ యార్డులో గూడ్స్ ట్రైన్ ప‌ట్టాలు త‌ప్పింది. ఈ గూడ్స్ ట్రైన్‌ నెల్లూరు నుంచి బిట్రగుంట స్టేషన్ యార్డులోకి వెళుతున్న సమయంలో ఈ ప్రమాదం జరిగిన‌ట్లు తెలుస్తోంది. ఈ ప్ర‌మాద స‌మ‌యంలో క్రాసింగ్ వద్ద రెండు వ్యాగన్లు పట్టాలు తప్పిన‌ట్లు స‌మాచారం.

ఈ గూడ్స్ ట్రైన్ పట్టాలు తప్పడంతో విజయవాడ వైపు వెళ్లే రైళ్లకు తీవ్ర అంతరాయం ఏర్పడిన‌ట్లు రైల్వే అధికారులు తెలిపారు. నెల్లూరులోని బిట్రగుంట రైల్వే స్టేషన్‌కు దక్షిణం వైపు ఉన్న 144వ లెవల్ క్రాసింగ్ గేటు వద్ద గూడ్స్ ఫార్మేషన్ ఆగడంతో అక్క‌డ రోడ్ ట్రాఫిక్ ఏర్పడింది. ప‌లు రైళ్ల‌రాక‌పోక‌ల‌కు తీవ్ర అంతరాయం ఏర్ప‌డింది.

వెంట‌నే సమాచారం అందుకున్న రైల్వే అధికారులు హుటాహుటిన ఘటనాస్థలికి చేరుకుని, రోడ్ ట్రాఫిక్‌ను క్లియ‌ర్ చేసేందుకు త‌గు చ‌ర్య‌లు చేప‌ట్టారు. అత్యవసర రైళ్లను మూడో లైన్‌లోకి పంపించాలని అధికారులు నిర్ణయించారు. వీటితోపాటు మిగిలిన రైళ్లకు కూడా అంత‌రాయం లేకుండా అధికారులు తగు చ‌ర్య‌లు చేప‌ట్టారు. ఈ నేప‌థ్యంలో విజ‌య‌వాడ‌వైపు వెళ్లే ప‌లు రైళ్లు ఆల‌స్యంగా న‌డ‌వ‌నున్న‌ట్లు అధికారులు తెలిపారు. కొద్ది గంట‌ల స‌మ‌యంలో రైళ్ల రాక‌పోక‌లు యాథావిధిగా ఉంటాయ‌ని అధికారుల సూచించారు.

English summary

A goods train derailed in Nellore district. A goods train derailed in Bitragunta railway station yard at five o'clock in the morning today. It is reported that two wagons derailed at the crossing during the accident