అక్కినేని నాస్తికుడు: భక్తుల పాత్రల్లో అలరించాడు
హైదరాబాద్: అక్కినేని నాగేశ్వర రావు సినిమాలు తెగచూసినవారు కూడా ఆయన నాస్తికుడంటే నమ్మకపోవచ్చు. ఆయన భక్తుల పాత్రలను పోషించి, అలరించిన తీరు చూస్తే ఆయనకు దేవుడిపై నమ్మకం లేదంటే ఎవరూ నమ్మరు. కానీ, అది నిజం. ఆయన పలుమార్లు ఈ విషయాన్ని సభల్లో చెప్పారు. ఆయన అఆలు అనే పుస్తకం కూడా రాశారు. ఆయన జీవితానికి సంబంధించి కొన్ని సూత్రాలు రూపొందించి వాటి ప్రకారం నడుచుకున్నారు.
మానవుడిపై ఆయన ఎక్కువ మక్కువ. అయినా ఆయన తెలుగు సినిమాల్లో భక్తాగ్రేసరుల పాత్రలను అమోఘంగా పోషించి మెప్పించారు. అక్కినేని తప్ప మరొకరు ఆ పాత్రలు అంతకన్నా గొప్పగా చేయలేరని అనిపించారు. మహాకవి కాళిదాసు, భక్త జయదేవ, మహాకవి క్షేత్రయ్య సినిమాల్లో ఆయన లీనమై నటించారు.
కాళిదాసు, క్షేత్రయ్య అచ్చం ఇలాగే ఉండేవారు అనిపించేలా నటించారు. భక్త తుకారాం, భక్త రామదాసు చిత్రాల గురించి చెప్పాల్సిన పని లేదు. విప్ర నారాయణ పాత్రకు కూడా ఆయనకు ఎనలేని పేరు వచ్చింది. జయభేరి, తెనాలి రామకృష్ణ వంటి సినిమాల్లో కూడా ఆయన అలరించారు.
ఓవైపు ఎన్టీ రామారావు పౌరాణిక పాత్రల్లో తన సత్తాను చాటుతుంటే భక్తుల పాత్రలను పోషించి అక్కినేని అలరించారు. మహాకవుల పాత్రలను ఆయన పోషించారు. దైవకృప కారణంగా మహా కవులైన కాళిదాసు, భక్త రామదాసు పాత్రలను ఆయన అమోఘంగా పోషించారు.