తీరం దాటి వచ్చిన దేవుళ్లు.. అలల కల్లోలంలో అద్భుత శివలింగాలు
కడలి కెరటాలు హఠాత్తుగా ఉగ్రరూపం దాల్చాయి. విరుచుకుపడే ప్రతి అల వెనుక ఏదో ఒక రహస్య నిధి దాగి ఉందన్న సంకేతం వినిపించింది. ఆ సముద్ర తీరం ఇప్పుడు కేవలం అలల హోరుతో మాత్రమే కాదు, కంటికి కనిపించని ఒక మహా అద్భుతంతో మార్మోగిపోతోంది. గత రెండు రోజులుగా సముద్రం విపరీతమైన ఉద్ధృతితో తీరం వైపు దూసుకొచ్చింది. ఆ రౌద్ర రూపం వెనుక దశాబ్దాల తరబడి దాగి ఉన్న ఒక మహత్తర చారిత్రక శోధన బయటపడుతుందని ఎవరూ ఊహించలేదు! తీరం కోతకు గురవుతున్న సమయంలో ఇసుక పొరల చాటు నుంచి పురాతన ఏకశిలా విగ్రహాలు, శివలింగాలు ఒక్కొక్కటిగా ప్రత్యక్షమవ్వడం స్థానికంగా తీవ్ర సంచలనం సృష్టిస్తోంది.
బాపట్ల జిల్లా వేటపాలెం మండలం పొట్టిసుబ్బయ్యపాలెంలో నిమిషానికో రీతిలో విరుచుకుపడుతున్న రాక్షస అలలు తీరాన్ని గుల్ల చేశాయి. ఇసుక దిబ్బలు కొట్టుకుపోతున్న కొద్దీ.. అక్కడ దశాబ్దాలుగా నిద్రపోతున్న అరుదైన ఏకశిలా శివలింగం, ఇతర ప్రాచీన విగ్రహాలు బయటకు రావడం చూసి స్థానికులు విస్తుపోయారు. కంటిచూపు మేరలో ఎన్నడూ కంటపడని ఈ శిల్పాలు ఒక్కసారిగా వెలుగులోకి రావడంతో ఈ ప్రాంతంలో ఏదో దైవిక శక్తుల మూలాలు ఉన్నాయనే ఆసక్తికర చర్చ మొదలైంది. పరిస్థితి తీవ్రతను గమనించిన అధికారులు తక్షణమే స్పందించి, పర్యాటకులు ఎవరూ సముద్రంలోకి వెళ్లకుండా తీరం పొడవునా కఠిన ఆంక్షలు విధించారు.
సముద్ర గర్భంలోంచి వచ్చాయా.. ఆలయ శిధిలాలా?
ఈ విగ్రహాల ప్రత్యక్షంపై ఊహాగానాలు పీక్స్కు చేరాయి. ఉగ్రరూపం దాల్చిన సముద్రం తన అగాధాల్లో దాచుకున్న పురాతన సంపదను బయటకు నెట్టిందా? లేక శతాబ్దాల క్రితం ఇక్కడే ఒక విరాజిల్లే శివాలయం ఉండి, కాలక్రమేణా కడలి కోతకు గురై భూమిలో కలిసిపోయిందా? అనే ప్రశ్నలు మిస్టరీగా మారాయి. తీరంలోని ఇసుక సడలడంతోనే ఈ ప్రాచీన శిల్పాలు బయటపడ్డాయని మెజారిటీ ప్రజలు బలంగా నమ్ముతున్నారు.
రహస్యాన్ని ఛేదించేందుకు పురావస్తు శాఖ సన్నాహాలు
బయటపడిన ఈ ఏకశిలా విగ్రహాలు ఏ కాలం నాటివి? ఏ రాజుల పరిపాలనలో వీటిని చెక్కారు? అనే మిస్టరీ తేలాల్సి ఉంది. సమాచారం అందుకున్న రెవిన్యూ శాఖతో పాటు పురావస్తు శాఖ అధికారులు పొట్టిసుబ్బయ్యపాలెం తీరానికి చేరుకుని ఈ విగ్రహాలను క్షుణ్ణంగా పరిశీలించనున్నారు. నిపుణుల కార్బన్ డేటింగ్, ప్రాథమిక పరిశోధనలు పూర్తయితే తప్ప ఈ తీరప్రాంతం వెనుక ఉన్న అసలు చారిత్రక రహస్యం బయటకు రాదు. ప్రస్తుతం ఈ అరుదైన శివలింగాలను చూడటానికి చుట్టుపక్కల గ్రామాల నుంచి జనం వేటపాలెం తీరానికి తండోపతండాలుగా తరలివస్తున్నారు.
Click it and Unblock the Notifications
Sign in with Google