ప్రకాశం జిల్లాకు గుడ్‌ న్యూస్: రెండు మెగా సోలార్ విద్యుత్ ప్లాంట్లకు లైన్ క్లియర్, 7.5 ల‌క్ష‌ల మందికి ఉపాధి..!

Updated: Tuesday, March 11, 2025, 17:05 [IST]

Andhra Pradesh: ప్ర‌కాశం జిల్లాలో రెండు ఆల్ట్రా మెగా సోలార్ విద్యుత్ ప్లాంట్ల‌ను ఏర్పాటు చేస్తున్నామ‌ని విద్యుత్ శాఖ మంత్రి గొట్టిపాటి ర‌వికుమార్ అసెంబ్లీ వేదికగా ప్ర‌క‌టించారు. అసెంబ్లీలో ఎమ్మెల్యేలు అడిగిన ప్ర‌శ్న‌ల‌కు మంత్రి గొట్టిపాటి మంగ‌ళ‌వారం స‌మాధానం చెప్పారు. దీనికి సంబంధించి మంత్రి గొట్టిపాటి రవికుమార్ స‌భ‌లో మాట్లాడుతూ... రాష్ట్రంలో పున‌రుత్పాద‌క విద్యుత్ ప్లాంట్ల ఏర్పాటుకు రాయ‌ల‌సీమ త‌రువాత ప్ర‌కాశం జిల్లానే అత్యంత అనువైన ప్రాంత‌మని తెలిపారు. ప్ర‌కాశం జిల్లా దొన‌కొండ‌, చంద్ర‌శేఖ‌ర‌పురం ప్రాంతాల్లో మెగా సోలార్ విద్యుత్ ప్లాంట్ల నిర్మాణానికి ప్ర‌భుత్వం సిద్ధంగా ఉంద‌ని పేర్కొన్నారు. ఒక్కో ప్లాంట్ నిర్మాణానికి సుమారు 5,500 ఎక‌రాల భూమి అవ‌స‌రమని మంత్రి స్పష్టం చేశారు. ప్లాంట్ల నిర్మాణానికి భూ కేటాయింపుల‌కు సంబంధించి ఇప్ప‌టికే ప్రకాశం జిల్లా క‌లెక్ట‌ర్ నుంచి నివేదిక కోరామ‌ని వెల్లడించారు. క‌లెక్ట‌ర్ నివేదిక త‌రువాత సోలార్ ప్లాంట్ల నిర్మాణాన్ని చేపడుతామని మంత్రి వివరించారు. ఒక్కో సోలార్ విద్యుత్ ప్లాంట్ ద్వారా సుమారు 1,000 మెగావాట్ల విద్యుత్ ఉత్ప‌త్తి జ‌రుగుతుంద‌ని తెలిపారు.

ఇంటిగ్రేటెడ్ క్లీన్ ఎన‌ర్జీ పాలసీ -2024 గేమ్ ఛేంజ‌ర్.....

ఆంధ్రప్రదేశ్ లో కూటమి ప్రభుత్వం అధికారంలోకి వచ్చిన అనంతరం ఇంటిగ్రేటెడ్ క్లీన్ ఎన‌ర్జీ పాలసీ - 2024 (ఐసీఈ) ద్వారా పున‌రుత్పాద‌క విద్యుత్ రంగంలో ఏపీ దేశంలోనే ప్ర‌థ‌మ స్థానంలో నిలుస్తుంద‌ని మంత్రి గొట్టిపాటి ర‌వికుమార్ ఆశాభావం వ్య‌క్తం చేశారు. ఇంటిగ్రేటెడ్ క్లీన్ ఎన‌ర్జీ పాల‌సీ ద్వారా 7.5 ల‌క్ష‌ల మందికి ఉద్యోగ‌, ఉపాధి అవ‌కాశాలు ల‌భిస్తాయ‌ని వెల్లడించారు. ఇంటిగ్రేటెడ్ క్లీన్ ఎన‌ర్జీ పాలసీ పాల‌సీ ద్వారా 100 గిగావాట్ల పున‌రుత్పాద‌క విద్యుత్ ఉత్ప‌త్తి ల‌క్ష్యంగా ముందుకెళ్తున్నామ‌ని మంత్రి గొట్టిపాటి రవికుమార్ అసెంబ్లీ వేదికగా వివరించారు.