డబ్బులు విడుదల చేసిన చంద్రబాబు ప్రభుత్వం... ఖాతాల్లో జమ

జూన్ 12వ తేదీన ముఖ్యమంత్రిగా ప్రమాణ స్వీకారం చేసిన చంద్రబాబు ప్రభుత్వం రాష్ట్రంలో పాలనను పరుగులు తీయిస్తోంది. అభివృద్ధికే ప్రాధాన్యమిచ్చే చంద్రబాబు ఈసారి సంక్షేమానికి కూడా సమాన ప్రాధాన్యత కల్పిస్తున్నారు. ఎన్నికల హామీల్లో ఇచ్చినవాటిని అమలు చేసేందుకు ప్రయత్నిస్తున్నారు. తాజాగా ఎన్టీఆర్ గృహ నిర్మాణ పథకం కింద ఇల్లు నిర్మించుకున్న లబ్ధిదారులకు కూటమి ప్రభుత్వం శుభవార్తను వినిపించింది. వీరికి రావల్సిన పెండింగ్ బిల్లులను క్లియర్ చేయనున్నట్లు ప్రకటించింది.

రూ.55 కోట్ల బిల్లుల చెల్లింపు
ఉమ్మడి కృష్ణా జిల్లాలో ఈ పథకంకింద 18వేల మంది లబ్ధిదారులు ఇళ్లు నిర్మించుకోగా అందుకు సంబంధించి రూ.55 కోట్ల బిల్లులు రావాల్సి ఉంది. 2014-19 మధ్య ఇళ్ల నిర్మాణాలు చేపట్టినవారికి బిల్లులు ఇవ్వాలని ముఖ్యమంత్రి చంద్రబాబు గృహ నిర్మాణశాఖను ఆదేశించారు. ఆ శాఖతో ఇటీవల నిర్వహించిన సమీక్షా సమావేశంలో ఈ నిర్ణయం తీసుకున్నారు. ఆ సమయంలో ఎన్ని ఇళ్లు నిర్మించారు? ఎంతమందికి బిల్లుల చెల్లింపు జరిగింది? ఇంకా ఇవ్వాల్సినవి ఎంత? అనే వివరాలను నివేదిక రూపంలో అధికారులు రూపొందించారు.

ఇంటి నిర్మాణానికి రూ.4 లక్షలు
ఇటీవలే అధికారంలోకి వచ్చిన కూటమి ప్రభుత్వం ఇంటి నిర్మాణ వ్యయాన్ని రూ.4 లక్షలకు పెంచుతూ నిర్ణయం తీసుకుంది. ప్రధానమంత్రి ఆవాస్ యోజనకు ఈ పథకాన్ని అనుసంధానించింది. గ్రామీణ ప్రాంతాల్లో స్థలం లేనివారికి 3 సెంట్లు, పట్టణ ప్రాంతాల్లో 2 సెంట్లు ఇవ్వబోతున్నారు. ఈమేరకు ముఖ్యమంత్రి చంద్రబాబు నిర్ణయం తీసుకున్నారు. ఎన్టీఆర్ గృహ నిర్మాణ పథకం కింద గత టీడీపీ ప్రభుత్వం రూ.2 లక్షలు ఇస్తే, తర్వాత అధికారంలోకి వచ్చిన వైసీపీ ప్రభుత్వం రూ.1.80 లక్షలు అందించింది. అప్పుడు గ్రామీణ ప్రాంతాల్లో 1.5 సెంట్లు, పట్టణాల్లో ఒక సెంటు స్థలం ఇచ్చారు.

English summary

The AP government has taken a decision to release bills of Rs.55 crore to those who have built houses in the joint Krishna district.