జగనన్న కాలనీల ఇళ్లస్థలాలపై కూటమి ప్రభుత్వ కీలక నిర్ణయం.. 45 రోజుల్లోగా అలా చెయ్యాల్సిందే!
గత ప్రభుత్వ హయాంలో గృహనిర్మాణాల కోసం చేపట్టిన జగనన్న కాలనీల అంశంపై ఆంధ్రప్రదేశ్ లోని కూటమి ప్రభుత్వం అత్యంత కీలకమైన నిర్ణయం తీసుకుంది. ఈ కాలనీల్లో ప్లాట్లు పొందిన లబ్ధిదారులు అక్కడ ఇళ్లు నిర్మించుకునేందుకు ఆసక్తిగా ఉన్నారా లేదా అనే అంశాన్ని క్షేత్రస్థాయిలో పరిశీలించేందుకు ప్రభుత్వం చర్యలు చేపట్టింది. ఇందులో భాగంగా ఒక ప్రత్యేక మంత్రుల కమిటీని నియమిస్తూ ప్రభుత్వం ఉత్తర్వులు జారీ చేసింది.
సరిగ్గా 45 రోజుల్లోగా ఈ సమస్యలన్నింటికీ శాశ్వత పరిష్కారం చూపాలని ఆ కమిటీకి ముఖ్యమంత్రి చంద్రబాబు నాయుడు స్పష్టమైన ఆదేశాలు జారీ చేశారు. గతంలో కేటాయించిన లేఅవుట్లలో సరైన మౌలిక వసతులు లేకపోవడం, కొన్ని ప్రాంతాలు నివాసయోగ్యంగా లేకపోవడంతో చాలామంది లబ్ధిదారులు అక్కడ ఇళ్లు కట్టుకునేందుకు వెనుకాడుతున్నట్లు ప్రభుత్వ దృష్టికి వచ్చింది. ఈ నేపథ్యంలో, ఆయా కాలనీల్లో ప్లాట్లు వద్దనుకునే లబ్ధిదారులకు ఇతర ప్రత్యామ్నాయ ప్రాంతాల్లో స్థలాలు కేటాయించే మార్గాలపై ప్రభుత్వం దృష్టి సారించింది.
దీనికి సంబంధించి లబ్ధిదారుల నుండి అధికారికంగా అభిప్రాయాలను సేకరించేందుకు త్వరలోనే ప్రత్యేక నోటీసులు కూడా పంపనున్నారు. ఈ మొత్తం ప్రాసెస్ ను పర్యవేక్షించేందుకు మరియు తక్షణ నిర్ణయాలు తీసుకునేందుకు గృహనిర్మాణ శాఖ మంత్రి పార్థసారథి, రెవెన్యూ శాఖ మంత్రి అనగాని సత్యప్రసాద్‌తో పాటుగా మంత్రులు కందుల దుర్గేష్, నాదెండ్ల మనోహర్‌లతో కూడిన నలుగురు సభ్యుల మంత్రుల కమిటీని ఏర్పాటు చేశారు.
అంతేకాకుండా, గత ప్రభుత్వ కాలంలో ఇళ్ల స్థలాల పేరుతో జరిగిన భూసేకరణలో కొన్ని అవకతవకలు, అక్రమాలు జరిగినట్లు ఆరోపణలు రావడంతో, ఆ విషయాలపై సమగ్ర విచారణ జరిపి త్వరలోనే ప్రభుత్వానికి నివేదిక అందజేయాలని అధికారులను ఆదేశించారు. మరోవైపు, ఇటీవల నిర్వహించిన 'ఆవాస్' సర్వే ద్వారా రాష్ట్రవ్యాప్తంగా దాదాపు 2 లక్షల మంది పేదలకు కొత్తగా ఇళ్ల స్థలాలు అవసరమని గుర్తించారు.
వీరందరికీ పారదర్శక పద్ధతిలో భూసేకరణ పూర్తి చేసి, త్వరలోనే ఇళ్ల నిర్మాణ పనులను వేగవంతం చేయాలని సీఎం అధికారులను ఆదేశించారు. పేదలందరికీ నిజమైన లబ్ధి చేకూర్చేలా, ఎలాంటి వివాదాలకు తావులేకుండా అర్హులైన ప్రతి ఒక్కరికీ నివాసయోగ్యమైన స్థలాలు అందేలా ప్రభుత్వం ఈ కార్యాచరణను అమలు చేస్తోంది.
Click it and Unblock the Notifications
Sign in with Google
