ఫోన్ ట్యాపింగ్‌పై ఆధారాలు, తెలంగాణ ప్రభుత్వానికి నోటీసులు?, బాబు ఏకాకి!

By Srinivas

Updated: Tuesday, June 16, 2015, 10:40 [IST]

హైదరాబాద్: ఏపీ ముఖ్యమంత్రి నారా చంద్రబాబు నాయుడు ఫోన్ ట్యాపింగ్ జరిగిందని చెప్పేందుకు అవసరమైన ఆధారాల సేకరణలో ఏపీ పోలీసులు ఉన్నట్లుగా సమాచారం. తమ వద్ద చంద్రబాబు ఆడియో టేపులు ఉన్నాయని తెలంగాణ హోంమంత్రి నాయిని నర్సింహా రెడ్డి చెప్పారు.

అవి టీవీ ఛానళ్లలో ప్రసారమయ్యాయని, ట్యాపింగ్ జరిగిందనడానికి ఇదే నిదర్శనమని ఇప్పటికే కేంద్ర హోం, టెలికం మంత్రిత్వ శాఖలకు నివేదించినట్లుగా తెలుస్తోంది. ఫోను ట్యాపింగ్ జరగకపోతే సంబంధిత ఆడియో టేపులు ఎక్కడి నుండి వచ్చాయో చెప్పాలనే అంశం అవసరమైతే తెలంగాణ ప్రభుత్వానికి నోటీసులు ఇవ్వాలని భావిస్తున్నట్లు తెలుస్తోంది.

మరోవైపు, ఓటుకు నోటు వ్యవహారంలో చంద్రబాబు ఏకాకి అయ్యారని నమస్తే తెలంగాణ పత్రిక రాసింది. జోక్యం చేసుకోవడానికి కేంద్రం కూడా విముఖత చూపిందని, బయటపడేయాలని సొంత పోలీసుల పైన చంద్రబాబు ఒత్తిడి తెస్తున్నారని రాసింది. ఏపీ పోలీసులు చేతులెత్తేస్తున్నారని పేర్కొంది.

మరోవైపు, చంద్రబాబు రాజీనామాకు విపక్షాలు డిమాండ్ చేస్తున్న విషయం తెలిసిందే. ఆడియో టేపుల్లో ఉన్నది చంద్రబాబు గొంతే అయితే, ఆయన రాజీనామా చేయాలని విపక్షాలు డిమాండ్ చేస్తున్నాయి.