బియాస్ ట్రాజెడీ: మృతులకు కన్నీటి వీడ్కోలు (పిక్చర్స్)

By Pratap

Published: Wednesday, June 11, 2014, 9:16 [IST]

హైదరాబాద్: హిమాచల్‌ప్రదేశ్ దుర్ఘటనలో దుర్మరణంపాలైన నలుగురు విద్యార్థుల్లో ఆకుల విజేత, రాంబాబు, ఐశ్వర్య అంత్యక్రియలు మంగళవారం జరిగాయి. సోమవారం అర్ధరాత్రి దాటాక విమానంలో తరలించిన మృతదేహాలను వారి కుటుంబసభ్యులకు అప్పగించారు. వీరిలో నల్లగొండ జిల్లా మోతె మండలం భీక్యాతండాకు చెందిన రాంబాబు మృతదేహాన్ని మంగళవారం తెల్లవారుజామున నాలుగింటికి స్వగ్రామానికి తరలించారు.

భారీ సంఖ్యలు గ్రామస్థులు వారి ఇంటికి తరలివచ్చి రాంబాబుకు అశ్రునివాళులు అర్పించారు. ఉదయం 11 గంటలకు భీక్యా తండాలోని వారి సొంత పొలం వద్ద రాంబాబు మృతదేహానికి అంత్యక్రియలు నిర్వహించారు. ఆకుల విజేత అంత్యక్రియలు పంజాగుట్ట శ్మశాన వాటికలో జరిగాయి. ఆమె అంతిమయాత్రకు బంధువులు, స్నేహితులు పెద్దఎత్తున హాజరై కన్నీటి వీడ్కోలు పలికారు. తండ్రి సూర్యకుమార్ ఆమె చితికి నిప్పంటించారు.

ఓల్డ్ అల్వాల్‌లోని జ్యోతినగర్‌కు చెందిన ఐశ్వర్య మృతదేహాన్ని పూలతో అలంకరించిన వాహనంలో ఊరేగించి గోల్నాక అల్వాల్ మీదుగా స్వర్గధామ్ శ్మశానవాటికకు తరలించారు. అక్కడ ఐశ్వర్య పార్ధీవ దేహంపై ఆమె స్నేహితులు, బంధువులు పూలమాలలువేసి నివాళులు అర్పించారు. అనంతరం అశ్రునయనాలతో అంత్యక్రియలు నిర్వహించారు. కూకట్‌పల్లిలోని ఈనాడు కాలనీకి చెందిన లక్ష్మీగాయత్రి అంత్యక్రియలు వెంకటరమణనగర్ శ్మశానవాటికలో జరిగాయి.