పథకం ప్రకారమే: ఎమ్మెల్యే రోజా మీద దాడిపై చెవిరెడ్డి

By Srinivas

Published: Sunday, September 14, 2014, 15:08 [IST]

హైదరాబాద్/చిత్తూరు: నగరిలో తమ పార్టీకి చెందిన శాసన సభ్యురాలు రోజాపై తెలుగుదేశం పార్టీ కార్యకర్తలు దాడి చేశారని, ఆ దాడిని ఖండిస్తున్నామని చంద్రగిరి ఎమ్మెల్యే చెవిరెడ్డి భాస్కర రెడ్డి అన్నారు. పథకం ప్రకారమే వైయస్సార్ కాంగ్రెసు పార్టీ నేతల పైన టీడీపీ కార్యకర్తలు దాడులకు దిగుతున్నారని ఆరోపించారు. తెలుగుదేశం పార్టీ దౌర్జన్యాలకు పాల్పడుతోందన్నారు.

కాగా, చిత్తూరు జిల్లాలోని నగరిలో దాడికి గురైన తమ పార్టీ శాసనసభ్యురాలు, సినీ నటి రోజాను వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి విషయం తెలియగానే పలకరించారు. పోన్ చేసి ఆమెను పరామర్శించారు. రోజా ఆరోగ్య పరిస్థితిని జగన్ అడిగి తెలుసుకున్నారు. రోజాపై జరిగిన దాడిని ఆయన ఖండించారు.

పోలీసుల సమక్షంలో మహిళా ఎమ్మెల్యేపై దాడి జరగడం దారుణమని ఆయన అన్నారు. మహిళా ఎమ్మెల్యేలకు రక్షణ కల్పించడంలో పోలీసులు విఫలమయ్యారని ఆయన అన్నారు. రోజాపై జరిగిన దాడి సంఘటనపై విచారణ జరిపించాలని ఆయన ప్రభుత్వాన్ని డిమాండ్ చేశారు. సంఘటనకు సంబంధించిన దోషులను కఠినంగా శిక్షించి, ఇటువంటి సంఘటనలు పునరావృతం కాకుండా చూడాలని ఆయన ప్రభుత్వాన్ని కోరారు.

చిత్తూరు జిల్లా నగరిలో రోజాపై దాడి జరిగిన విషయం తెలిసిందే. అమ్మవారి జాతరలో హారతి వెలిగించే సందర్భంలో రోజాపై దాడి జరిగింది. దాడిలో రోజా చేతికి గాయమైంది. తెలుగుదేశం పార్టీవారే ఈ దాడికి పాల్పడ్డారంటూ వైయస్సార్ కాంగ్రెసు పార్టీ నాయకులు ఆరోపించారు.

Published On September 14, 2014