ఉండవల్లిపై కాంగ్రెసు వేటు: ఎమ్మెల్యే రౌతు రాజీనామా

రాజమండ్రి: రాజమండ్రి పార్లమెంటు సభ్యుడు ఉండవల్లి అరుణ్ కుమార్‌పై కాంగ్రెసు పార్టీ వేటు వేసినందుకు నిరసనగా రాజమండ్రి కాంగ్రెసు శాసనసభ్యుడు రౌతు సూర్యప్రకాష్ రావు పార్టీకి రాజీనామా చేశారు. యుపిఎ ప్రభుత్వంపై అవిశ్వాస తీర్మానం ప్రతిపాదించిన ఆరుగురు పార్లమెంటు సభ్యులపై కాంగ్రెసు బహిష్కరణ వేటు వేసిన విషయం తెలిసిందే. ఆ ఆరుగురిలో ఉండవల్లి అరుణ్ కుమార్ కూడా ఉన్నారు.

తన రాజీనామా లేఖను పిసిసి అధ్యక్షుడు బొత్స సత్యనారాయణకు ఫాక్స్ చేసినట్లు రౌతు సూర్యప్రకాష్ రావు తెలిపారు. ఉండవల్లి అరుణ్ కుమార్ నిజాయితీ గల నాయకుడని, ప్రజల సంక్షేమం కోసం పనిచేశారని, ఉండవల్లిపై బహిష్కరణకు నిరసనగా తాను రాజీనామా చేశానని ఆయన వివరించారు.

తాను పిసిసి అధ్యక్షుడు బొత్స సత్యనారాయణను కలుస్తానని ఆయన చెప్పారు. తూర్పు గోదావరి జిల్లా రాజమండ్రి శాసనసభా నియోజకవర్గం నుంచి రౌతు సూర్యప్రకాష్ రావు ప్రాతినిధ్యం వహిస్తున్నారు. తన రాజకీయ భవిష్యత్తుపై నిర్ణయం తీసుకుంటానని ఆయన చెప్పారు.

కాగా, పార్లమెంటు సభ్యుల బహిష్కరణపై సీమాంధ్ర కాంగ్రెసు నాయకులు తీవ్ర నిరసన వ్యక్తం చేశారు. రాయలసీమకు చెందిన మంత్రి శైలజానాథ్, ఉత్తరాంధ్రకు చెందిన మంత్రి గంటా శ్రీనివాస రావు పార్లమెంటు సభ్యుల బహిష్కరణపై నిరసన వ్యక్తం చేశారు.

English summary

Congress MLA in Rajahmundry Routhu Surya Prakash Rao tonight resigned from the party to protest the expulsion of Lok Sabha member V Arun Kumar.