పెళ్లి చూపులే, నచ్చితే ఓకే: పొత్తుపై జవదేకర్, డెడ్‌లైన్

న్యూఢిల్లీ: తెలుగుదేశం పార్టీతో పొత్తు విషయమై భారతీయ జనతా పార్టీ అధికార ప్రతినిధి ప్రకాశ్ జవదేకర్ ఆసక్తికరమైన వ్యాఖ్యలు చేశారు. పొత్తులను, పెళ్లి సంబంధంతో పోల్చారు. తద్వారా టిడిపికి షాకిచ్చారు. చర్చలు పెళ్లి చూపుల లాంటివని వ్యాఖ్యానించారు. పెళ్లి చూపుల తర్వాత నచ్చితేనే పెళ్లి లేదంటే లేదు అన్నారు.

ప్రస్తుతం తెలుగుదేశం పార్టీతో చర్చలు జరుగుతున్నాయని చెప్పారు. చర్చలు సఫలమైతే పొత్తు లేదంటే లేదు అని అభిప్రాయపడ్డారు. సీట్ల పైన తెలుగుదేశం పార్టీ స్పష్టమైన నిర్ణయానికి రావాలన్నారు. పొత్తు ఎప్పుడు ఖరారయ్యేది తాను చెప్పలేనని తెలిపారు. టిడిపితో పొత్తుపై చర్చలు సానుకూలంగానే కనిపిస్తున్నాయని అన్నారు. స్పష్టత వచ్చాక ప్రకటన చేస్తామన్నారు.

ప్రస్తుతం పొత్తు చర్చలు టిడిపితో మాత్రమే కొనసాగుతున్నాయని తెలిపారు. ఈ సాయంత్రం వరకు టిడిపికి గడువు ఇస్తున్నామని చెప్పారు. జాప్యం చేస్తే ఇరు పార్టీలకు నష్టమని తేల్చి చెప్పారు. ఆంధ్రప్రదేశ్‌లో కాంగ్రెసు పార్టీ ఖాళీ అయిందన్నారు. లౌకికవాదంపై చర్చకు తాము సిద్ధమని, అసలైన మతతత్వ పార్టీ కాంగ్రెసు అన్నారు.

రాష్ట్రంలో పొత్తు ఇరు పార్టీలకు అవసరమని బిజెపి సీనియర్ నేత బండారు దత్తాత్రేయ అన్నారు. పట్టువిడుపులు ఉంటేనే పొత్తులు కుదురుతాయన్నారు. తెలుగుదేశం పార్టీతో తమ పార్టీకి పొత్తు కుదిరినట్లు వస్తున్న వార్తలు అవాస్తవమన్నారు. కాగా, బిజెపితో పొత్తు దాదాపు కుదిరిందని టిటిడిపి నేతలు చెబుతున్న విషయం తెలిసిందే.

English summary

BJP spokes person Prakash Jawadekar on Wednesday said the discussions are going on.