చంద్రబాబు ప్రణాళికవల్లే: సుమన్

తెలుగుదేశం పార్టీ అధినేత చంద్రబాబుపై రజనీకాంత్ చేసిన ప్రసంగంలో తప్పేమీ లేదని ప్రముఖ నటుడు సుమన్ వ్యాఖ్యానించారు. విజయవాడలో ఎన్టీఆర్ శతజయంతి ఉత్సవాలకు ముఖ్యఅతిథిగా హాజరైన రజనీకాంత్ చంద్రబాబుపై ప్రశంసలు గుప్పించారు. ఏపీ రాజకీయాల గురించి తమిళ నటుడికి ఏం తెలుస్తుందంటూ వైసీపీ నాయకులు రజనీని టార్గెట్ చేశారు. ఓ ఇంటర్వ్యూలో నటుడు సుమన్ తన అభిప్రాయాన్ని పంచుకున్నారు.

రజినీకాంత్‌ తన ప్రసంగంలో ఏ పార్టీని, నాయకుడిని విమర్శించలేదని.. అలాంటిది వైసీపీ నేతలు ఆయన్ను ఎందుకు విమర్శిస్తున్నారని సుమన్ ప్రశ్నించారు. హైదరాబాద్ కు కొత్త రూపం తీసుకొచ్చింది చంద్రబాబేనని, ప్రధాన రూపశిల్పి ఆయనేనన్నారు. శంషాబాద్‌ విమానాశ్రయం, ఐటీ రంగం వంటివి వచ్చి.. ఇంతమంది ఉపాధి పొందుతున్నారంటే.. అవన్నీ చంద్రబాబునాయుడి ప్రణాళికలవల్లేనన్నారు. రాజకీయాల్లో ఒడుదొడుకులు, కొన్ని తప్పొప్పులు సర్వ సాధారణమని.. చంద్రబాబునాయుడు మంచి ముఖ్యమంత్రి అని సుమన్ ప్రశంసించారు.

ఎన్టీఆర్ శతజయంతి వేడుకలకు హాజరైన సూపర్ స్టార్ రజనీకాంత్ చంద్రబాబు విజన్ గురించి కీలక వ్యాఖ్యలు చేశారు. ఇటీవల హైదరాబాద్ వెళ్లినప్పుడు న్యూయార్క్ లో ఉన్నామా? లేక హైదరాబాద్ లో ఉన్నామా? అనే భావన కలిగిందని చెప్పారు. రజనీ వ్యాఖ్యలపై తెలంగాణ మంత్రి కేటీఆర్ కూడా స్పందించారు. హైదరాబాద్ అభివృద్ధిని సెలబ్రిటీలు సైతం మెచ్చుకుంటున్నారని, రజనీకాంత్ హైదరాబాద్ ను న్యాయార్క్ తో పోల్చారన్నారు. బీఆర్ఎస్ ప్రభుత్వం హైదరాబాద్ ను విశ్వనగరంగా మార్చేందుకు కృషి చేస్తోందని, తమ ప్రభుత్వం వచ్చిన తర్వాత అంతర్జాతీయస్థాయిలో పలు సమావేశాలను నిర్వహించడమే కాకుండా వివిధ ప్రాజెక్టులను తీసుకువచ్చామన్నారు.

English summary

Veteran actor Suman commented that there was nothing wrong with Rajinikanth's speech on Telugu Desam Party chief Chandrababu Babu.