ఎదుర్కున్నా కట్టడాలను కూల్చేస్తున్నారు (పిక్చర్స్)

By Pratap

Published: Friday, July 18, 2014, 11:50 [IST]

హైదరాబాద్: గ్రేటర్ హైదరాబాద్ పరిధిలోని అక్రమ నిర్మాణాల కూల్చివేతలను జిహెచ్ఎంసి అధికారులు కూల్చివేస్తున్నారు. ప్రతిఘటన ఎదురైనా ఆగడం లేదు. బల్దియా అధికారులు గురువారం మరో 14 అక్రమ నిర్మాణాలను కూల్చివేశారు. వీటిలో సర్కిల్ 1 కాప్రాలోని అనుమతిని ఉల్లంఘించి నిర్మించిన ఓ భవనంలోని రెండో అంతస్తును కూల్చివేయగా, సర్కిల్ మూడు పాతబస్తీలోని రెండు భవనాల్లో3,4 అంతస్తులు, మరో భవనంలోని మూడో అంతస్తులను కూల్చివేసినట్లు బల్దియా అధికారులు తెలిపారు.

సర్కిల్ నాలుగులోని యాకుత్‌పురాలో కూడా శిథిలావస్థకు చేరిన మరో భవనాన్ని అధికారులు గురువారం కూల్చివేశారు. అలాగే సర్కిల్ 7 పరిధిలోని గోల్కొండలోని బడా బజార్, జాస్మైన్‌నగర్‌లోని రెండు భవనాల్లోని మొదటి అంతస్తులను కూల్చివేశారు. వీటితో పాటు సర్కిల్ 9లోని రాంనగర్‌లో రెండు భవనాల్లోని 3,4, 2, 3 భవనాలను అధికారులు కూల్చివేసినట్లు తెలిపారు.

సర్కిల్ 10లోని మధురానగర్, బంజరాహిల్స్ రోడ్ నెం.4లోని అదనంగా నిర్మించిన రెండు అంతస్తులను, అలాగే మరో పెంటౌజ్‌ను అధికారులు కూల్చివేసినట్లు తెలిపారు. సర్కిల్ 12లో కూడా చందానగర్, మియాపూర్‌లలో అక్రమంగా ఏర్పాటు చేసిన ఓ షెడ్డు, మరో భవనంలోని రెండో అంతస్తులను పోలీసుల బందోబస్తుతో కూల్చివేశారు. సర్కిల్ 14లోని సర్దార్ పాపారాయుడునగర్‌లోని ఓ భవనంలోని 3వ అంతస్తు, మరో భవనంలోని నాలుగో అంతస్తును కూల్చివేశారు.

అలాగే సర్కిల్ 15లోని గాజులరామారంలో అనుమతిని ఉల్లంఘించి, అక్రమంగా వేసిన అయిదో అంతస్తును, అలాగే సర్కిల్ 16లోని ఆల్వాల్ మారుతీనగర్‌లో రెండో అంతస్తును, ఇదే ప్రాంతంలోని మరో భవనంలోని మొదటి అంతస్తులను కూల్చివేసినట్లు అధికారులు తెలిపారు. వీటితో పాటు సర్కిల్ 17లో అక్రమంగా నిర్మించిన జి ప్లస్ వన్ భవనాన్ని, సర్కిల్ 18లోని ఈస్ట్‌మారెడ్‌పల్లిలోని బాల్కానీని ముందుకు నిర్మించిన భవనాన్ని కూల్చివేసినట్లు అధికారులు తెలిపారు.