పార్టీ పెడితే కిరణ్ వైపు ఎంతమంది, జగన్ హవా తగ్గేనా?

By Srinivas

Published: Friday, December 20, 2013, 11:01 [IST]

హైదరాబాద్: ముఖ్యమంత్రి కిరణ్ కుమార్ రెడ్డి కొత్త పార్టీ పెడతారనే ప్రచారం నేపథ్యంలో ఆయన వైపు ఎవరెవరు ఉన్నారనే దానిపై చర్చ జరుగుతోంది. కొత్త పార్టీ ఏర్పాటు చేసే విషయాన్ని కిరణ్ గతంలో ఖండించినప్పటికీ ప్రచారం మాత్రం కొనసాగుతోంది. దీంతో కిరణ్ వైపు ఎంతమంది ఎమ్మెల్యేలు, ఎంపీలు వెళ్తారనే చర్చ రాజకీయ వర్గాల్లో జరుగుతోంది. కిరణ్ పార్టీ పెడితే సీమాంధ్రలో జగన్ పార్టీ హవా తగ్గుతుందని భావిస్తున్నారు.

పార్లమెంట్‌లో కేంద్ర ప్రభుత్వంపై అవిశ్వాస తీర్మానం ప్రవేశ పెట్టిన ఆరుగురు కాంగ్రెస్ ఎంపీలు కిరణ్‌తోనే ఉన్నారని, ఆయన పకడ్బందీగా జరిపిన వ్యూహం ప్రకారమే అడుగులు వేస్తున్నారని అంటున్నారు.

లగడపాటి రాజగోపాల్, సబ్బం హరి, ఉండవల్లి అరుణ్ కుమార్, సాయి ప్రతాప్, హర్ష కుమార్, రాయపాటి సాంబశివ రావు కొత్త పార్టీలో ముఖ్యమైన పాత్రలు పోషించే అవకాశాలు లేకపోలేదంటున్నారు. జగన్‌ను కలిసి ఆ తర్వాత వెనక్కి తగ్గిన అనంత వెంకట్రామి రెడ్డి కూడా ముఖ్యమంత్రి వైపే చూస్తున్నారని ప్రచారం జరుగుతోంది.

మరోవైపు కిరణ్ పార్టీ అభ్యర్థుల పైనా ఇప్పటికే అంతర్గతంగా కసరత్తు ప్రారంభించారట. ప్రజల్లో విశ్వసనీయత, సమైక్యాంధ్ర కోసం కట్టుబడిన నాయకులనే ఎంచుకుంటున్నారట. ప్రస్తుతం శాసన సభలోని సీమాంధ్ర ఎమ్మెల్యేలో ఎక్కువ మంది కిరణ్‌తో ఉన్నారని చెబుతున్నారు.

గురువారం జెసి దివాకర్ రెడ్డి మాట్లాడుతూ.. కాంగ్రెసు సీమాంధ్రలో కన్ను కోల్పోయిందని, కొత్త ఫ్లాట్ ఫాం కోసం చూస్తున్నారని, కిరణ్ పార్టీ పెడితే చూస్తానని వ్యాఖ్యానించారు. అయితే మాజీ మంత్రి డిఎల్ రవీంద్రా రెడ్డి వంటి కొందరు మాత్రం కిరణ్ పార్టీ పెట్టరని చెబుతున్నారు.

Published On December 20, 2013