అప్పట్లో అలా, ఇంటర్ ఫస్టియర్ ఫెయిలయ్యా, సినిమాలపై ఆసక్తి లేదు, కానీ..: చంద్రబాబు
అమరావతి: తనకు పదహారేళ్ల వయసున్నప్పుడు అన్నింటిని చాలా తేలికగా తీసుకునేవాడినని, అందుకే.. ఇంటర్ ఫస్టియర్ ఫెయిలయ్యానని ఏపీ సీఎం చంద్రబాబునాయుడు తన చిన్ననాటి విషయాలను గుర్తుచేసుకున్నారు. రాజకీయ జీవితంలో నలభై ఏళ్లు పూర్తి చేసుకున్న సందర్భంగా ఓ ఛానెల్కు ఇచ్చిన ఇంటర్య్యూలో ఆయన మాట్లాడారు.
ఆ తర్వాత తిరుపతి వెళ్లి చదువుకున్న తనకు అన్నీ విజయాలేనని చెప్పారు. విద్యార్థి దశలో తానెప్పుడూ సిగరెట్ తాగలేదని ఓ ప్రశ్నకు సమాధానంగా ఆయన చెప్పారు. యూనివర్శిటీలో చదువుకుంటున్న సమయంలో అవతలి బ్యాచ్తో గొడవ జరిగిన సందర్భాన్ని చంద్రబాబు గుర్తుచేసుకున్నారు.
ఆ సమయంలో అవతలి బ్యాచ్ వారిని చూసి తమ బ్యాచ్ వాళ్లు భయపడి పారిపోయారని, అయితే తాను వెళ్లి తమ బ్యాచ్ను ముందుకు నడిపించనని, దీంతో అవతలి బ్యాచ్ వాళ్లు పారిపోయారని తెలిపారు. ఈ సంఘటనతో తనపై కేసులు పెట్టారని, ఆ తర్వాత కొట్టేశారని చెప్పారు.
'హింస' అనే పదానికి తన జీవితంలో చోటులేదని ముఖ్యమంత్రి చంద్రబాబునాయుడు చెప్పుకొచ్చారు. విద్యార్థిగా ఉన్నప్పుడు చేసిన రాజకీయాలు.. మంత్రి, ముఖ్యమంత్రి అయ్యాక చేస్తే ఫ్యాక్షనిస్టులు అవుతారని, పదవిని అనుసరించి స్వభావాన్ని మార్చుకోవాల్సిన అవసరం ఉంటుందని ఈ సందర్భంగా చంద్రబాబు అభిప్రాయపడ్డారు.
సినిమాలు చూడటం మొదటి నుంచి తనకు అలవాటు లేదని, అయితే, 'బాహుబలి' సినిమా మాత్రం చూశానని ఏపీ సీఎం చంద్రబాబునాయుడు చెప్పారు. ఆ సినిమాను కుటుంబ సమేతంగా ఇంట్లోనే చూశానని, మల్టీప్లెక్స్ లకు వెళ్లి సినిమాలు చూసే అలవాటు తనకు లేదని చెప్పారు. అదే విధంగా, హోటల్ భోజనాలు చేసే అలవాటు కూడా తనకు లేదని, అయితే, విదేశీ పర్యటనలకు వెళ్లినప్పుడు మాత్రం తప్పదని అన్నారు.