ఎన్టీఆర్‌కే చెల్లింది: పవన్‌పై జెసి, జాగ్రత్త: ఫ్యాన్స్ హెచ్చరిక

By Srinivas

Published: Friday, March 21, 2014, 13:23 [IST]

హైదరాబాద్/విజయవాడ/అనంతపురం: జనసేన పార్టీ అధ్యక్షులు, పవర్ స్టార్ పవన్ కళ్యాణ్ ఉద్వేగభరితంగా ఉన్నారని మాజీ మంత్రి జెసి దివాకర్ రెడ్డి అన్నారు. ఆయన ఈ నెల 23న తెలుగుదేశం పార్టీలో చేరనున్న విషయం తెలిసిందే. ఆయన అనంతలో విలేకరులతో మాట్లాడారు. సినిమా గ్లామర్‌తో ఓట్లు రాబట్టుకోవడం ఒక్క స్వర్గీయ నందమూరి తారక రామారావుకే చెల్లిందన్నారు.

ఇప్పడు సినిమా గ్లామర్‌ను చూసి ఓట్లు వేసే పరిస్థితి లేదని అభిప్రాయపడ్డారు. ఇప్పటి వరకు మరే హీరో అలా ఓట్లు రాబట్టుకోలేకపోయారన్నారు. పవన్ ఉద్వేగభరితంగా ఉన్నారని చెప్పారు. వైయస్సార్ కాంగ్రెసు పార్టీ అధ్యక్షలు వైయస్ జగన్మోహన్ రెడ్డికి తన హామీల పైన ఎలాంటి స్పష్టత లేదన్నారు.

సంతకాలు చేస్తామంటే ప్రజలు నమ్మే పరిస్థితులు లేవన్నారు. చంద్రబాబు పైన ప్రజలు విశ్వాసంతో ఉన్నారన్నారు. చంద్రబాబు చెప్పిన రుణమాఫీని అన్ని వర్గాల వారు నమ్ముతున్నారని, మహిళలు కూడా తెలుగుదేశం పార్టీ వైపు చూస్తున్నారన్నారు. సీమాంధ్రలో కాంగ్రెసు పార్టీ చచ్చిపోయిందన్నారు. కాంగ్రెసు నిర్వహిస్తున్న బస్సుయాత్ర ఆ పార్టీకి శవయాత్రనే అన్నారు. కాంగ్రెసు పార్టీకి మాస్క్ పెట్టి బతికి ఉందని నమ్మిస్తున్నారని ఎద్దేవా చేశారు.

షబ్బీర్ అలీకి హెచ్చరిక

పవన్ కళ్యాణ్ పైన తీవ్ర విమర్శలు చేసిన కాంగ్రెస్ నేత షబ్బీర్ అలీపై పవన్ అభిమానులు నిప్పులు చెరిగారు. ఏదైనా మాట్లాడే ముందు నిజాలు తెలుసుకోవాలని ఇష్టం వచ్చినట్టు మాట్లాడితే ఖబడ్దార్ అంటూ హెచ్చరించారు. తిరుపతిలో శుక్రవారం పవన్ ఫ్యాన్స్ మీడియా సమావేశంలో ఈ హెచ్చరికలు జారీ చేశారు. మీ ఇంటి కొస్తాం చూసుకుందామా?, లేక నీవే మా ఊరు వస్తావా? అని సవాల్ విసిరారు. నోరు మూసుకోకపోతే నీ బాగోతమంతా యూట్యూబ్‌లో, సోషల్ నెట్ వర్కింగ్ సైట్లలో పెడతామని హెచ్చరించారు.

Published On March 21, 2014