బాబుతో వద్దంటే, కులం పేరుపెట్టి దొర అంటారా?: కెసిఆర్

మెదక్: తన కులం పేరు పెట్టి తనను దొర అంటే ఎలా అని తెలంగాణ రాష్ట్ర సమితి అధ్యక్షులు కల్వకుంట్ల చంద్రశేఖర రావు బుధవారం అన్నారు. ఆయన ఉదయం కోయినాపల్లి వెంకటేశ్వర స్వామి వారి ఆలయంలో ప్రత్యేక పూజలు నిర్వహించారు. అనంతరం మాట్లాడారు. తనకు సిద్దిపేటతో ఉన్న అనుబంధం మరువలేనిదన్నారు. తనను ఈ స్థాయికి తీసుకు వచ్చింది సిద్దిపేట గడ్డనే అన్నారు. కులం పేరు పెట్టి దొర అంటే ఎలా అని, తాను ఎప్పుడు ప్రజల మధ్యనే ఉన్నానని చెప్పారు.

తెరాస అధికారంలోకి రావాలన్నారు. తెలంగాణను అద్భుతంగా తీర్చి దిద్దుతానన్నారు. తనకు తెలంగాణ తెచ్చిన కీర్తి చాలని, పదవులు అనవసరమన్నారు. తెలంగాణవారికి ఆంధ్రా శక్తుల పీడ ఇంకా విరగడ కాలేదన్నారు. బిజెపి కార్యకర్తలు వద్దన్నా చంద్రబాబు బలవంతంగా పొత్తు పెట్టుకున్నారని విమర్శించారు. ఎన్నికల ప్రణాళికలో చెప్పినవి అన్నీ తాను నెరవేరుస్తానని, కాంగ్రెసు, టిడిపిలకు వారి హామీలపై చిత్తశుద్ధి లేదన్నారు.

ప్రజలకు మంచి జరగాలంటే మంచి ప్రభుత్వం రావాలన్నారు. రాజకీయ అవినీతి అంతం అయితేనే తెలంగాణ బాగుపడుతుందని చెప్పారు. వంద కోట్లు సంపాదించే దుష్ట సంప్రదాయం పోవాలన్నారు. తెలంగాణ అడుగడుగునా దోపిడీకి, వివక్షకు గురయిందని ఆవేదన వ్యక్తం చేశారు. తెలంగాణ బాగు పడాలంటే 16 ఎంపీ గెలవాలని, శాసన సభలో తెరాస ఉండాలన్నారు. కత్తి ఒకరి చేతిలో పెట్టి యుద్ధం ఒకరిని చేయమనంటే ఎలా అన్నారు.

తెలంగాణ తెచ్చిన కీర్తి ముందు పదవులు తనకు లెక్క కాదన్నారు. టిడిపి, కాంగ్రెసు ప్రభుత్వాలు మనం చూడనివి కావన్నారు. తెరాస ప్రభుత్వం వస్తే కోటి ఎకరాలకు నీరు అందిస్తామన్నారు. కేంద్రంలో రాబోయేది సంకీర్ణ ప్రభుత్వమన్నారు. తెలంగాణలోని ఉద్యోగులు తెలంగాణలో.. సీమాంధ్రలోని ఉద్యోగులు సీమాంధ్రలో ఉండాల్సిందేనన్నారు. కాగా, కెసిఆర్ మెదక్ లోకసభ స్థానానికి సంగారెడ్డిలో నామినేషన్ పత్రాలు దాఖలు చేస్తారు. అనంతరం మధ్యాహ్నం గంటలకు గజ్వేల్ అసెంబ్లీ స్థానానికి నామినేషన్ వేస్తారు.

English summary

TRS chief K Chandrasekhar Rao to file nomination today.