టీ పట్ల బీజేపీకి వివక్ష లేదు: కేసీఆర్‌కు సొంత ఎంపీ షాక్

హైదరాబాద్: తెలంగాణ ప్రభుత్వం పట్ల కేంద్రంలోని భారతీయ జనతా పార్టీ నేతృత్వంలో ఉన్న ఎన్డీయే ప్రభుత్వం వివక్ష చూపడం లేదని తెలంగాణ రాష్ట్ర సమితి నేత, చేవెళ్ల పార్లమెంటు సభ్యుడు కొండా విశ్వేశ్వర్ రెడ్డి అన్నారు. ఆంధ్రప్రదేశ్ ముఖ్యమంత్రి నారా చంద్రబాబు నాయుడు, కేంద్రమంత్రి వెంకయ్య నాయుడు చెప్పుడు మాటలు కేంద్రంలో నమ్మేవారని, తెరాస ఎంపీలు వాస్తవాలు వివరించిన తర్వాత తమనే నమ్ముతున్నారన్నారు.

పార్లమెంట్‌లోనూ మాట్లాడే అవకాశం కల్పిస్తున్నారన్నారు. హైదరాబాద్‌పై గవర్నర్‌కు అధికారాలు కట్టబెట్టిన విషయమై కేంద్ర హోంమంత్రి రాజ్‌నాథ్ సింగ్‌కు వాస్తవాలు వెల్లడించామన్నారు. దీంతో టీఆర్‌ఎస్‌ ఎంపీలతో సమావేశానికి అంగీకరించారన్నారు. తెలంగాణ కంటే చిన్న రాష్ట్రాలలో ఎయిమ్స్‌ ఏర్పాటు చేశారని, ఆంధ్రప్రదేశ్‌లో ఏర్పాటు చేసి తెలంగాణను విస్మరించారని పార్లమెంట్‌లో ప్రస్తావించగా.. తెలంగాణాకు ఎయిమ్స్‌ మంజూరైందన్నారు.

తెలంగాణపై బీజేపీ సానుకూలంగానే ఉందన్నారు. తెలంగాణ మినహా అన్ని రాష్ట్రాలకు ఎయిమ్స్ మంజూరు చేయడమేమిటని ప్రశ్నించగానే.. రెండు వారాల్లో రాష్ట్రానికి రూ.1,200 కోట్లతో ఎయిమ్స్ మంజూరయిందని చెప్పారు. ఈ మేరకు కేంద్రం నుండి ముఖ్యమంత్రి కల్వకుంట్ల చంద్రశేఖర రావుకు లేఖ వచ్చిందన్నారు.

వచ్చే బడ్జెట్‌లో మంజూరు అవుతాయన్నారు. తన నియోజకవర్గ పరిధిలో దీనిని నెలకొల్పేందుకు సీఎం సానుకూలత వ్యక్తం చేశారన్నారు. గవర్నర్‌కు శాంతిభద్రతల అధికారాలు కట్టబెట్టే విషయమై ఈ నెల 18 తర్వాత కేంద్ర హోంమంత్రిని కలిసి వివరిస్తామన్నారు. తెలంగాణ నుండి కొత్తగా ఎన్నికైన వారికి మాట్లాడే అవకాశం ఇస్తున్నారని, ఉమాభారతి, స్మృతి ఇరానీ వంటి వారు బాగా సహకరిస్తున్నారని చెప్పారు.

English summary

Telangana Rastra Samithi MP Konda Vishweshwar Reddy backs BJP.