ఎన్నికలు: లెజెండ్ సినిమాపై బాలకృష్ణ అలాచెప్పారా?
హైదరాబాద్: తెలుగుదేశం పార్టీ హిందూపురం శాసన సభ్యుడు, ప్రముఖ తెలుగు నటుడు నందమూరి బాలకృష్ణ ఆసక్తికర వ్యాఖ్యలు చేశారు. 2014 సార్వత్రిక ఎన్నికలకు కొద్ది నెలల ముందు ఆయన నటించిన లెజెండ్ చిత్రం విడుదలై, సూపర్ డూపర్ హిట్ అయిన విషయం తెలిసిందే.
దీనిపై ఆయన మాట్లాడారు. లెజెండ్ సినిమాను నాటి ఎన్నికల్లో పార్టీకి లబ్ధి చేకూర్చేందుకే తీసుకు వచ్చినట్లు ఆయన అభిప్రాయపడినట్లుగా తెలుస్తోంది. ఈ సినిమాను ఎన్నికలకు కొద్ది నెలల ముందు తెచ్చామని, అందరి మూడ్ పార్టీ వైపు మళ్లించేందుకు తెచ్చామని చెప్పినట్లుగా తెలుస్తోంది.
కాగా, ఎన్టీఆర్, తెలుగు.. ఈ మాటలు వింటుంటే తన రక్తం ఉప్పొంగుతుందని సినీనటుడు, హిందూపురం ఎమ్మెల్యే బాలకృష్ణ మహానాడులో రెండు రోజుల క్రితం అన్నారు.
తెదేపా జాతీయ పార్టీగా మారినందుకు సంతోషంగా ఉందన్నారు. దేశమంతా కాంగ్రెస్ గాలి వీచినప్పుడు కూడా ఇక్కడ తెదేపా గెలుస్తుందని పేర్కొన్నారు. తెదేపా భవిష్యత్తులో దేశ రాజకీయాల్లో కీలకపాత్ర పోషించాలని ఆయన ఆశాభావం వ్యక్తం చేశారు.
తెలుగు జాతికి ఎన్టీఆర్ అంతర్జాతీయంగా పేరు తెచ్చారన్నారు. దేశవ్యాప్తంగా కాంగ్రెస్ గాలి వీచినప్పుడు కూడా ఇక్కడ టీడీపీ గెలిచిందన్నారు. భవిష్యత్తులో దేశ రాజకీయాల్లో కీలకపాత్ర పోషించాలన్నారు.