తిరుపతి SV Campus లో.. సీసీటీవీ ఫుటేజీలో..(వీడియో)

Tirumala: కలియుగ దైవం శ్రీవేంకటేశ్వర స్వామివారు వెలిసిన తిరుమల శేషాచలం అడవుల్లో చిరుతలు, ఇతర వణ్య ప్రాణుల సంఖ్య భారీగా పెరిగింది. తిరుమల, అలిపిరి సహా పలు వేర్వేరు ప్రాంతాల్లో చిరుతలు తరచూ కనిపిస్తోన్నాయి. వాటిని టీటీడీ అటవీ శాఖ అధికారులు సీసీటీవీ కెమెరాల ద్వారా గుర్తించారు. ఎలుగుబంట్లు, ఇతర వణ్యప్రాణుల సంచారం కూడా రెట్టింపైందనే నిర్ధారణకు వచ్చారు. ఇదివరకు అలిపిరి నుంచి గాలిగోపురం, శ్రీలక్ష్మీ నరసింహస్వామి ఆలయం, 38వ మలుపు ప్రాంతాల్లో చిరుతలు సంచరించాయి.

తాజాగా తిరుమల గిరులను ఆనుకుని ఉన్న ప్రఖ్యాత శ్రీవేంకటేశ్వర యూనివర్శిటీ క్యాంపస్‌లో ఓ చిరుత స్వేచ్ఛగా తిరుగాడింది. ఓ కుక్కను తరమడం కనిపించింది. క్యాంపస్ ఆవరణలో అమర్చిన సీసీటీవీ ఫుటేజీల్లో ఈ చిరుత కదలికలు స్పష్టంగా రికార్డయ్యాయి. శుక్రవారం అర్ధరాత్రి దాటిన తర్వాత 12: 47 నిమిషాలకు ఈ చిరుత కనిపించింది. పాపులేషన్ స్టడీస్, ఐ బ్లాక్‌ల మధ్య కొత్త నిర్మాణాలు జరుగుతున్న ప్రదేశంలో చిరుత సంచరించింది. అక్కడే ఉన్న ఓ కుక్కను తరిమింది.

దీనికి సంబంధించిన వీడియోలు సోషల్ మీడియాలో వైరల్ అయ్యాయి. ఈ విషయాన్ని విద్యార్థులు వర్శిటీ అధికారులు, టీటీడీ అటవీశాఖ సిబ్బందికి తెలియజేశారు. ముందుజాగ్రత్త చర్యలను తీసుకోవాలని విజ్ఞప్తి చేశారు. వేలమంది విద్యార్థులు క్యాంపస్‌లో ఉంటోన్నారు. అలాంటి చోట చిరుత ప్రవేశించడం ఆందోళనకు గురి చేస్తోంది. దీన్ని బంధించడానికి చర్యలు తీసుకుంటామని అధికారులు తెలిపారు. చిరుత తిరుగాడే ప్రాంతాల్లో బోను ఏర్పాటు చేస్తామని పేర్కొన్నారు.

టీటీడీ అటవీ శాఖ అధికారులు గతంలో క్యాంపస్ ఆవరణలో బోన్లు ఏర్పాటు చేశారు. దాదాపు రెండు నెలల కిందట ఓ చిరుత బోనులో చిక్కింది. ఇప్పుడు మళ్లీ ఇంకో చిరుత ఎస్వీ యూనివర్శిటీ క్యాంపస్, హాస్టల్ బ్లాక్ ల మధ్య తిరుగాడుతోండటం విద్యార్థులు, సిబ్బందిని భయాందోళనకు గురి చేస్తోంది. రాత్రివేళ ఎవరూ బయటకు తిరగకూడదని, అప్రమత్తంగా ఉండాలని ఎస్వీ యూనివర్శిటీ అధికారులు విద్యార్థులకు సూచించారు.

English summary

A Leopard spotted in the Sri Venkateswara University Campus. A video shows that the wild cat tries to hunt a Dog. అలాంటి చోట చిరుత ప్రవేశించడం ఆందోళనకు గురి చేస్తోంది. దీన్ని బంధించడానికి చర్యలు తీసుకుంటామని అధికారులు తెలిపారు. చిరుత తిరుగాడే ప్రాంతాల్లో బోను ఏర్పాటు చేస్తామని పేర్కొన్నారు.