తోపుదుర్తి సోదరులు చంపాలని చూస్తున్నారు - మహానందరెడ్డి

ఆంధ్రప్రదేశ్ లోని అనంతపురం రాజకీయాల్లో మళ్లీ ఉద్రిక్తత వాతావరణం నెలకొంది. రాప్తాడు మాజీ ఎమ్మెల్యే తోపుదుర్తి ప్రకాశ్‌రెడ్డి, ఆయన సోదరులు తనపై ప్రాణహానికి కుట్ర పన్నుతున్నారని వైసీపీ బహిష్కృత నేత మహానందరెడ్డి సంచలన ఆరోపణలు చేశారు. అనంతపురంలో మీడియా సమావేశం ఏర్పాటు చేసిన ఆయన.. తనను చంపడానికి ప్రయత్నాలు చేస్తున్నారంటూ సంచలన వ్యాఖ్యలు చేశారు.

ప్రాణహాని..

ఈ మేరకు మహానందరెడ్డి మాట్లాడుతూ.. వైసీపీ ప్రభుత్వ హయాంలోనే ప్రకాశ్‌రెడ్డి తనను హత్య చేయాలని యత్నించారని, ఇప్పుడు కూడా అదే ప్రయత్నం కొనసాగుతోందని ఆరోపించారు. అమెరికాలో ఉన్న తన అన్న కుమారుడికి ఫోన్ చేసి "మీ చిన్నాన్నను చంపేస్తాం" అని బెదిరించారని వెల్లడించారు. ప్రస్తుత అధికార పార్టీ నేతలతో ప్రకాశ్‌రెడ్డి లోపాయికారీ ఒప్పందాలు చేసుకుని తనను అంతమొందించేందుకు ప్రయత్నిస్తున్నారని ఆయన అన్నారు.

టీడీపీ ఎమ్మెల్యేపై ఆరోపణలు..

ఈ కుట్రలో అనంతపురం అర్బన్ టీడీపీ ఎమ్మెల్యే దగ్గుపాటి వెంకటేశ్వరప్రసాద్ కూడా భాగస్వామి అయ్యారని మహానందరెడ్డి ఆరోపించారు. పోలీసులను ఒత్తిడి చేసి తనను అక్రమంగా అరెస్టు చేయించి, హత్య చేయించాలనే ప్రయత్నాలు జరుగుతున్నాయని ఆయన తెలిపారు. రాజకీయ కక్షల కారణంగా ఇప్పటికే తన కుటుంబంలోని ఇద్దరిని కోల్పోయానని, ఇప్పుడు తన ప్రాణానికే ముప్పు ఏర్పడిందని ఆయన ఆవేదన వ్యక్తం చేశారు.

భూకబ్జాల ఆరోపణలు..

అంతే కాకుండా ప్రకాశ్‌రెడ్డి అనేక భూకబ్జాలు చేశారని, వాటికి సంబంధించిన ఆధారాలు తన వద్ద ఉన్నాయని మహానందరెడ్డి స్పష్టం చేశారు. ఉప్పరపల్లిలోని వంక పోరంబోకు భూములను, బెంగళూరు రోడ్డులో మాజీ సైనిక ఉద్యోగి పేరుతో సృష్టించిన భూములను ప్రకాశ్‌రెడ్డి అక్రమంగా కాజేశారని ఆయన ఆరోపించారు. ఈ అక్రమాలన్నీ తాను త్వరలోనే బయట పెడతానని హెచ్చరించారు. ఈ విషయాలు బయటకు రాకముందే తనను అడ్డుకోవాలని ప్రకాశ్‌రెడ్డి ప్రయత్నిస్తున్నారని ఆయన వ్యాఖ్యానించారు.

మరోవైపు తన అన్న ప్రసాద్‌రెడ్డి హత్య కేసులో ఉన్న నిందితులను ప్రకాశ్‌రెడ్డి తన వెంట తిప్పుకుంటున్నారని మహానందరెడ్డి తెలిపారు. గతంలో పంచాయతీ ఎన్నికల్లో తన భార్య 33 ఓట్ల మెజారిటీతో గెలిచినా, ఓడిపోయిన టీడీపీ అభ్యర్థిని విజేతగా ప్రకటించారని గుర్తుచేశారు. రాజకీయ కుట్రలతోనే తన కుటుంబం నిరంతరం నష్టపోతోందని ఆయన ఆరోపించారు.

English summary

An atmosphere of tension has once again prevailed in the politics of Anantapur in Andhra Pradesh. Expelled YSRCP leader Mahananda Reddy has made sensational allegations that former Raptadu MLA Topudurthi Prakash Reddy and his brothers are conspiring to kill him.