ఏపీలో భారీగా ఐఏఎస్, ఐపీఎస్ బదిలీలు! సర్కారు కసరత్తు!

ఏపీలో పాలనా యంత్రాంగాన్ని మరింత సమర్థవంతంగా తీర్చిదిద్దేందుకు ముఖ్యమంత్రి చంద్రబాబు నాయుడు భారీ ఎత్తున ఐఏఎస్, ఐపీఎస్ అధికారుల బదిలీలకు రంగం సిద్దం చేశారు. గత రెండ్రోజులుగా సీఎం దీనిపై విస్తృతంగా కసరత్తు చేస్తున్నారు. ముఖ్యంగా పాలనా వ్యవస్థలో మార్పులు తీసుకురావాలన్న లక్ష్యంతో ఆయన ఈ నిర్ణయం తీసుకున్నట్లు తెలుస్తోంది.

బదిలీల ప్రక్రియ ముమ్మరం
టీటీడీలోని సీనియర్ అధికారులు, వివిధ శాఖాధిపతులు, కలెక్టర్లు, ఎస్పీలతో సహా పలు కీలక పదవుల్లో ఉన్న అధికారులను బదిలీ చేయనున్నారు. ఆదివారం కూడా ముఖ్యమంత్రి చంద్రబాబు బదిలీల జాబితాపై సుదీర్ఘంగా చర్చించారు. దాదాపు తుది జాబితాను ఖరారు చేసినట్లు సమాచారం. రానున్న రెండు, మూడు రోజుల్లో బదిలీల ఉత్తర్వులు విడుదలయ్యే అవకాశం ఉంది.

ప్రాధాన్యత ఎవరికి?
తొలి విడతలో అధిక సంఖ్యలో సీనియర్ ఐఏఎస్, ఐపీఎస్ అధికారుల పేర్లు ఉండే అవకాశం ఉంది. ఆ తర్వాత శాఖాధిపతులు, కొందరు కలెక్టర్లు, ఎస్పీల బదిలీల ఉత్తర్వులు జారీ చేయబడతాయని తెలిసింది. అంతే కాకుండా విద్యుత్ పంపిణీ సంస్థల్లో కూడా బదిలీలు ఉండనున్నాయి. సర్కారు ఇప్పటికే కలెక్టర్ల పనితీరుపై రెండు, మూడు దశల్లో సమాచారం సేకరించింది. ఈ సమాచారాన్ని క్షుణ్ణంగా పరిశీలించి పనితీరు మెరుగ్గా లేని అధికారులను బదిలీ చేసేందుకు తుది జాబితా రూపొందించినట్లు తెలుస్తోంది. ప్రభుత్వం తమ ప్రాధాన్యతలకు అనుగుణంగా అధికారులను నియమించుకోవడానికి ఈ బదిలీలు కీలకం కానున్నాయి. ఈ బదిలీల ద్వారా పాలనలో కొత్త ఉత్సాహం, వేగం వస్తాయని ప్రభుత్వం భావిస్తోంది. దీనిపై అధికారిక ప్రకటన త్వరలో వెలువడనుంది.

English summary

Andhra Pradesh CM Chandrababu Naidu is preparing for large-scale transfers of IAS and IPS officers to streamline governance. Final list expected soon; senior officials, collectors, SPs to be affected.