ఫేస్బుక్లో యువతులకు అశ్లీల ఫోటోలు పెట్టి అడ్డంగా దొరికిన ప్రొఫెసర్
కాకినాడ: ఓ ప్రొపెసర్ తన ఫేస్బుక్ ఖాతా ద్వారా యువతులకు అశ్లీల చిత్రాలు, అసభ్య సందేశాలు పంపిస్తూ అడ్డంగా దొరికిపోయాడు. ఈ సంఘటన తూర్పు గోదావరి జిల్లాలో జరిగింది. ఇందుకు సంబంధించిన వివరాలు ఇలా ఉన్నాయి.
కాకినాడలోని ఓ ఇంజనీరింగ్ కళాశాలలో పనిచేస్తున్న నరేష్ తప్పుడు ఫేస్బుక్ ఖాతా తెరిచాడు. దాని నుంచి అమ్మాయిలకు ఫ్రెండ్స్ రిక్వెస్ట్ పెట్టి పరిచయం చేసుకుని, ఆపై అసభ్య మెసేజ్లు చిత్రాలు పంపుతూ వేధించేవాడు. దీనిపై పెనుగొండకు చెందిన ఓ యువతి పోలీసులకు ఫిర్యాదు చేసింది.
కేసు నమోదు చేసిన పోలీసులు విచారణ జరిపి నరేష్ను అదుపులోకి తీసుకున్నారు. నరేష్ గుంటూరు జిల్లా రేపల్లెకు చెందినవాడు. పెనుగొండ యువతి ఫిర్యాదు మేరకు పోలీసులు విచారణ జరిపి, అతనిని శనివారం నాడు అరెస్టు చేశారు. కోర్టు ఆయనకు రిమాండ్ విధించింది.
అంతర్వేదిలో గ్యాస్ లీకేజి
అంతర్వేదిలోని 28వ ఓఎన్జీసీ బావి పైప్లైన్ నుంచి ఆదివారం గ్యాస్ లీకేజీ అయింది. స్థానికులు వెంటనే గుర్తించి మోరీ జీసీఎస్ అధికారులకు సమాచారం అందించారు.
సిబ్బంది అక్కడికి చేరుకొని మరమ్మతులు చేపట్టారు. అయితే శనివారం కూడా ఇదే ప్రాంతంలో గ్యాస్ లీకవడంతో స్థానికులు తీవ్ర భయాందోళనకు గురయ్యారు. ఓఎన్జీసీ సిబ్బందిపై ఆగ్రహం వ్యక్తం చేశారు. ప్రస్తుతం గ్యాస్ లీకేజీ అదుపులోకి వచ్చింది.