బీజేపీ అభ్యర్థికి మద్దతు ప్రకటించిన మెగాస్టార్

ఏపీలో రాజకీయాలు రసవత్తరంగా మారాయి. గెలుపు కోసం రాజకీయ పార్టీలన్నీ కూడా గట్టిగానే శ్రమిస్తున్నాయి. వైసీపీ అధినేత జగన్ మేమంతా సిద్ధం పేరిట బస్సు యాత్ర చేస్తుండగా,టీడీపీ అధినేత చంద్రబాబు ప్రజాగళం పేరుతో ఎన్నికల ప్రచారం నిర్వహిస్తున్నారు. జనసేనాని పవన్ కల్యాణ్ సైతం వారాహి విజయభేరి సభలంటూ నిరంతరం ప్రజల్లో ఉండేలా ప్లాన్ చేసుకుంటున్నారు. ఇక అధికారంలో ఉన్న వైసీపీని ఓడించడమే లక్ష్యంగా టీడీపీ, జనసేన, బీజేపీ పార్టీలు పొత్తు పెట్టుకున్నాయి.

వైసీపీ అధికారంలో ఉండటం వల్ల రాష్ట్ర అభివృద్ది కుంటుపడిందని కూటమి నేతలు విమర్శిస్తున్నారు. ఎన్నికల ప్రచారంలో మూడు పార్టీలకు చెందిన నేతలు అధికార పార్టీపై విమర్శలు చేస్తున్నారు. టికెట్ దక్కిన అభ్యర్థులు తమ నియోజకవర్గాల్లో జోరుగా ప్రచారం నిర్వహిస్తున్నారు. పొత్తులో భాగంగా అనకాపల్లి పార్లమెంట్ స్థానాన్ని మాజీ రాజ్యసభ్యుడు సీఎం రమేష్ దక్కించుకున్నారు.

ఆయన బీజేపీ నుంచి పోటీ చేయనున్నారు. ప్రచారంలో భాగంగా సోమవారం మెగాస్టార్ చిరంజీవితో భేటీ అయ్యారు. చిరంజీవిని కలిసిన సీఎం రమేష్ ఆయన మద్దతు కోరారు. ఈ సందర్భంగా సీఎం రమేష్‌కు అభినందనలు తెలిపిన చిరంజీవి ఎన్నికల్లో గెలుస్తారని.. తన మద్దతు ఎప్పుడూ ఉంటుందని.. ప్రజల కోసం ఎల్లప్పుడు పాటుపడేవారికి మద్దతిస్తామని చిరంజీవి అన్నారు. ఇదిలా ఉంటే చిరంజీవి ఇటీవలే తన తమ్ముడు పవన్ కల్యాణ్ పార్టీకి మద్దతుగా నిలిచారు. జనసేనకు రూ.5 కోట్ల రూపాయిల భారీ విరాళం ఇచ్చారాయన.ఇప్పుడు తమ్ముడు పార్టీతో కలిసి పోటీ చేస్తున్న అభ్యర్థికి తన మద్దతు ప్రకటించారాయన.

English summary

CM Ramesh politely met Megastar Chiranjeevi.