జల జగడం .. వైఎస్సార్ పైన కూడా.. తెలంగాణా మంత్రుల విజ్ఞత అది : మంత్రి అనిల్ ధ్వజం

Published: Monday, June 28, 2021, 17:22 [IST]

ఆంధ్రప్రదేశ్ తెలంగాణ రాష్ట్రాల మధ్య కొనసాగుతున్న జల వివాదాల నేపథ్యంలో ఏపీ నీటిపారుదల శాఖ మంత్రి అనిల్ కుమార్ యాదవ్ మరోమారు తెలంగాణ మంత్రుల వ్యవహారశైలిపై తీవ్ర ఆక్షేపణ వ్యక్తం చేశారు. ఉభయ రాష్ట్రాల మధ్య నీటి సమస్యను సామరస్యంగా పరిష్కరించడానికి కృషి చేస్తున్న సమయంలో తెలంగాణ మంత్రులు ఇష్టమొచ్చినట్టు, నోటికొచ్చినట్లు మాట్లాడటం ఏమాత్రం బాగోలేదని మంత్రి అనిల్ కుమార్ యాదవ్ తీవ్రస్థాయిలో ధ్వజమెత్తారు.

తెలంగాణా ప్రభుత్వ వ్యవహార శైలిపై మంత్రి అనిల్ ఫైర్

తెలంగాణ ప్రభుత్వం లేనిపోని రాద్ధాంతం సృష్టిస్తోందని, తెలంగాణ ప్రభుత్వ వ్యవహార శైలిపై కూడా అనిల్ కుమార్ యాదవ్ విరుచుకుపడ్డారు. ఏపీ ప్రభుత్వం ఇచ్చిన మాట ప్రకారమే నీటి వాటా తీసుకుంటున్నామని పేర్కొన్న మంత్రి అనిల్ కుమార్ యాదవ్ తమ ప్రభుత్వానికి ఉన్న హక్కు తాము ఉపయోగించుకుంటున్నామని స్పష్టం చేశారు.నీటి విషయంలో తెలుగుదేశం పార్టీ నేతలు నోరు విప్పడం లేదని తీవ్ర అసహనం వ్యక్తం చేశారు. రాయలసీమ తో పాటుగా నెల్లూరు ప్రకాశం జిల్లాలను సస్యశ్యామలం చేయడానికి సీఎం జగన్ మోహన్ రెడ్డి కృషి చేస్తున్నారని పేర్కొన్నారు మంత్రి అనిల్ కుమార్ యాదవ్.

వైఎస్సార్ పైన కూడా నోటికొచ్చినట్టు వ్యాఖ్యలు .. తెలంగాణా మంత్రుల విజ్ఞత అది

ఇక దివంగత సీఎం వైయస్ రాజశేఖర్ రెడ్డి పై కూడా నోటికొచ్చినట్లు మాట్లాడుతున్నారని, ఆ మాటలను తెలంగాణ మంత్రుల విజ్ఞతకే వదిలేస్తున్నామని మంత్రి అనిల్ కుమార్ యాదవ్ పేర్కొన్నారు. జగన్ పైన తీవ్ర వ్యాఖ్యలు చేస్తున్నారని, తమకు కూడా వ్యాఖ్యలు చేయడం వచ్చని పేర్కొన్న మంత్రి అనిల్ సామరస్యంగా సమస్యలు పరిష్కరించుకుందాం అని సీఎం జగన్ చెప్పారని, అందుకే తాము తెలంగాణ మంత్రుల్లా మాట్లాడడం లేదని స్పష్టం చేశారు. ఏపీ హక్కుగా ఎన్ని నీళ్లు వాడుకోవాలో అన్ని నీళ్ళు కచ్చితంగా వాడుకుంటామని తేల్చిచెప్పారు.

అక్రమంగా నీటి ప్రాజెక్ట్ లు నిర్మించలేదని మరోసారి స్పష్టం

అక్రమంగా తాము ఎలాంటి ప్రాజెక్టులు నిర్మించడం లేదని మంత్రి అనిల్ కుమార్ స్పష్టం చేశారు. ఇక టిడిపి రాయలసీమ అభివృద్ధికి దోహదపడే పోతిరెడ్డిపాడు లిఫ్ట్ ఇరిగేషన్ ఏర్పాటుపై మద్దతు ఇవ్వకుండా ప్రజలను మోసం చేస్తున్నారని విమర్శించారు. గతంలో టీడీపీ ప్రభుత్వం అక్రమంగా నిర్మించిన పాలమూరు డిండి, కల్వకుర్తి ప్రాజెక్టులను అడ్డుకోలేక పోయిందని నిప్పులు చెరిగారు. రాయలసీమ పట్ల వివక్ష చూపించే వారిగా టిడిపి నాయకులు మారారని మంత్రి అనిల్ కుమార్ యాదవ్ అటు టిడిపిని, ఇటు తెలంగాణ మంత్రులను టార్గెట్ చేసి ఫైర్ అయ్యారు.

Published On June 28, 2021