నిజాం మళ్లీ పుట్టాడనిపిస్తోంది: కేసీఆర్‌పై మోత్కుపల్లి

హైదరాబాద్: తెలంగాణ ముఖ్యమంత్రి కల్వకుంట్ల చంద్రశేఖర రావును చూస్తుంటే నిజాం మళ్లీ పుట్టాడనిపిస్తోందని తెలంగాణ టీడీపీ నేత మోత్కుపల్లి నర్సింహులు శుక్రవారం మండిపడ్డారు. గోల్కొండ కోటలో జాతీయ జెండా ఎగరవేయడం కేసీఆర్ భూస్వామ్య పెత్తందారీ మనస్తత్వానికి నిదర్శనమన్నారు. సెప్టెంబర్ 17ను అధికారికంగా నిర్వహించాలని డిమాండ్ చేశారు. శుభకార్యాలను వాయిదా వేసుకోవాలనడం సరికాదన్నారు.

ఎన్నికల మేనిఫెస్టో అంటే భగవద్గీత, ఖురాన్, బైబిల్‌తో సమానమన్న కేసీఆర్ ఇప్పుడు మాట తప్పుతున్నారని తెలంగాణ టీడీపీ నేత ఎల్ రమణ మండిపడ్డారు. మరో నెల రోజుల పాటు పని చేయను అనడానికి ఇదేమైనా కేసీఆర్ జాగీరా అని ప్రశ్నించారు. ప్రతిక్షణం ప్రజల కోసం పనిచేయాల్సిందే అన్నారు.

కేసీఆర్‌ది తుగ్లక్ పాలన ఎర్రబెల్లి దయాకర్‌రావు ధ్వజమెత్తారు. ఫీజు రీయింబర్స్‌మెంట్ విషయంలో విద్యార్థులు ఆందోళనగా ఉన్నారన్న ఆయన సమగ్ర సర్వే ఒక్కరోజులో అవ్వదని, వారం రోజులు గడువు ఇవ్వాలన్నారు. కేసీఆర్ మాటల్లో స్వర్గం, చేతుల్లో నరకం చూపిస్తున్నారన్నారు. కేసీఆర్ అసమర్థత వల్లే కరెంట్ కష్టాలన్నారు. అధికారంలోకి వస్తే 8 గంటల కరెంట్ ఇస్తామని చెప్పిన కేసీఆర్ సొంత జిల్లాలోనే లాఠీలతో రైతులను కొట్టించారన్నారు.

English summary

Telangana Telugudesam Party senior leader Mothkupalli Narasimhulu lashed out at KCR.