యజమాని కూతురిపై లైంగిక దాడి: అసభ్యంగా ప్రవర్తించి షీ టీమ్స్‌కు చిక్కిన ఆటో డ్రైవర్

హైదరాబాద్: యజమాని కూతురిని పెళ్లి చేసుకుంటానని నమ్మించి లైంగికదాడి చేసిన యువకుడిని పోలీసులు గురువారంనాడు అరెస్టు చేశారు. ఇన్‌స్పెక్టర్ రాంమోహన్‌రెడ్డి కథనం ప్రకారం.. గోల్నాకలో బుక్ బైండింగ్ ప్రెస్‌ను నడుపుతున్న ఓ వ్యక్తి వద్ద పాత్లవత్ సురేష్ పనిచేస్తున్నాడు.

కొంతకాలంగా ప్రేమిస్తున్నంటూ యజమాని కూతురు వెంటబడుతున్నాడు. గత నెల 12న వెంట తీసుకెళ్లి లైంగికదాడికి పాల్పడ్డాడు. బాధితురాలి తల్లిదండ్రులు అదే నెల 27న అంబర్‌పేట పోలీసులకు ఫిర్యాదు చేశారు. సురేష్‌ను గురువారం అరెస్టు చేసి రిమాండ్‌కు తరలించారు.

నడుచుకుంటూ వెళ్తున్న ఓ మహిళపై ఈవ్‌టీజింగ్‌కు పాల్పడి అసభ్యకరంగా ప్రవర్తించిన ఆటో డ్రైవర్‌ను షీ టీమ్స్ అరెస్టు చేశాయి. ఫేస్‌బుక్‌లో వచ్చిన ఫిర్యాదుతో రంగంలోకి దిగిన షీ టీమ్స్ నిందితుడిని అదుపులోకి తీసుకున్నాయి. నగర అదనపు కమిషనర్ స్వాతీ లక్రా కథనం ప్రకారం - రామంతాపూర్‌కు చెందిన మేడబోయిన రాములు ఆటో డ్రైవర్.

సికింద్రాబాదులోని లోత్‌కుంటకు చెందిన ఓ మహిళ నడుచుకుంటూ వెళ్తుండగాఆటో కావాలా అని అడిగాడు. ఆమె వద్దంటూ చెప్పి ముందుకు వెళ్లింది. వెనకాలే వచ్చిన అతను ఈవ్‌టీజింగ్ చేస్తూ అసభ్యకరంగా ప్రవర్తించాడు.

జరిగిన విషయాన్ని ఆమె తన భర్తకు చెప్పింది. ఆయన వెంటనే షీ టీమ్స్ ఫేస్‌బుక్ పేజీలో ఫిర్యాదు చేశారు. రంగంలోకి దిగిన పోలీసులు ఆటో నెంబర్ సహాయంతో రాములును గుర్తించి అదుపులోకి తీసుకొని తుకారంగేట్ పోలీస్ స్టేషన్‌కు అప్పగించారు. కేసు నమోదు చేసిన పోలీసులు నిందితుడిని కోర్టులో హాజరు పరిచారు.

English summary

Pathalavath Suresh sexually assaulted against his press owner's daughter in Hyderabad. She teams nabbed an auto driver with facebook comlplaint in secendurabad.