కృష్ణయ్యపై, కెకెలపై రాళ్ల దాడి, టిడిపి తమ్ముళ్ల వీరంగం

By Srinivas

Updated: Wednesday, April 9, 2014, 15:15 [IST]

హైదరాబాద్: బిసి సంఘం అధ్యక్షులు, తెలుగుదేశం పార్టీ నేత ఆర్ కృష్ణయ్య పైన రాళ్లతో దాడి చేశారు. ఆయనను తెలుగుదేశం పార్టీ తరఫున ఎల్బీ నగర్ అసెంబ్లీ నియోజకవర్గం నుండి పోటీ చేయనున్న విషయం తెలిసిందే. ఆయన ఈ రోజు నామినేషన్ దాఖలు చేసేందుకు వెళ్తున్న సమయంలో... ఆ పార్టీ తరఫున టిక్కెట్ ఆశించి భంగపడ్డ వర్గానికి చెందిన వారు రాళ్లతో దాడి చేశారు. ఈ దాడిలో కృష్ణయ్య కారు అద్దాలు ధ్వంసమయ్యాయి. పోలీసులు నిరసనకారులను చెదరగొట్టారు.

నల్గొండలో కార్యాలయంపై దాడి

నల్గొండ జిల్లా తెలుగుదేశం పార్టీ కార్యాలయాన్ని తెలుగు తమ్ముళ్లు ధ్వసం చేశారు. పార్టీ కోసం త్యాగాలు చేసిన తమను సంప్రదించకుండా భారతీయ జనతా పార్టీకి కేటాయించడాన్ని తట్టుకోలేని కంచర్ల భూపాల్ రెడ్డి వర్గీయులు జిల్లా పార్టీ కార్యాలయంపై దాడి చేశారు.

పార్టీ కార్యాలయం పైన ఉన్న జెండా పీకేసి, కుర్చీలను విరగ్గొట్టి, అద్దాలను ధ్వసం చేశారు. అధికారంలో లేకపోయినా పార్టీని, క్యాడర్‌ని కాపాడుకుంటూ వస్తున్న తమను విస్మరించడాన్ని వారు తట్టుకోలేకపోతున్నారు. బిజెపి వాళ్లకి వారి కుటుంబ సభ్యుల ఓట్లు తప్ప అదనంగా ఒక్క ఓటు కూడా రాదని అలాంటి వారికి ఎలా కేటాయిస్తారన్నారు.

మెదక్‌లో కెకె వాహనంపై రాళ్ల దాడి

మెదక్ జిల్లాలో తెరాస సీనియర్ నేత కె కేశవ రావు వాహనంపై రాళ్ల దాడి జరిగింది. ఈ దాడిని తెలుగుదేశం పార్టీ కార్యకర్తలు చేసి ఉంటారని భావిస్తున్నారు.