ఏపీని పాకిస్థాన్‌తో పోల్చిన నేత

మాజీ మంత్రి, వైసీపీ ఎమ్మెల్సీ బొత్స సత్యనారాయణ ఆంధ్రప్రదేశ్ ఆర్థిక పరిస్థితిపై తీవ్ర ఆందోళన వ్యక్తం చేశారు. రాష్ట్రం ఆర్థికంగా పాకిస్తాన్‌లా మారుతోందని ఆయన సంచలన వ్యాఖ్యలు చేశారు. సంపద సృష్టిస్తామని ఎన్నికల సమయంలో చెప్పిన హామీలు ఏమయ్యాయని ఆయన ప్రభుత్వాన్ని నిలదీశారు. వరి ధాన్యం సేకరణలో ప్రభుత్వం పూర్తిగా విఫలమైందని ఆయన ఆరోపించారు. ఏడాది కాలంగా ప్రభుత్వం హనీమూన్ చేసిందని, ఇచ్చిన ఒక్క హామీని కూడా నెరవేర్చలేదని ఆయన విమర్శించారు. సూపర్ సిక్స్ హామీ ఏమైందని ఆయన ప్రశ్నించారు.

ప్రధాన ప్రతిపక్షంగా తమను గుర్తించకపోవడంపై బొత్స సత్యనారాయణ ఆగ్రహం వ్యక్తం చేశారు. 40 శాతం ప్రజలు తమకు ఓటు వేశారని ఆయన గుర్తు చేశారు. రాష్ట్రంలో ఎక్కడ చూసినా అవినీతి తాండవిస్తోందని ఆయన ఆరోపించారు. రైతుల సమస్యలపై వైసీపీ క్షేత్రస్థాయిలో పోరాటం చేస్తుందని, జగన్ కూడా రైతుల వద్దకు వస్తారని ఆయన తెలిపారు. ఆక్వా, పొగాకు రైతుల సమస్యలను ప్రభుత్వం దృష్టికి తీసుకెళ్తామని ఆయన చెప్పారు.

జూన్ లోపు మండల స్థాయి, జులై లోపు జిల్లా స్థాయి కమిటీలు ఏర్పాటు చేస్తామని, జూన్ 1 నుంచి 50 రోజుల్లో ఐదు జిల్లా పార్టీ సమావేశాలు నిర్వహిస్తామని బొత్స సత్యనారాయణ తెలిపారు. సీజ్ ద షిప్ హామీ ఏమైందని ఆయన ప్రశ్నించారు. ఎకరం 99 పైసలకు ఇవ్వడం దేశంలో ఎక్కడా లేదని ఆయన అన్నారు. పోలీసులతో ప్రభుత్వాలు నడుపుతానంటే కలకలం తప్పదని ఆయన హెచ్చరించారు. ధాన్యం కొనుగోలు విషయంలో సివిల్ సప్లై మంత్రి చెబుతున్న మాటలు అబద్ధాలని ఆయన అన్నారు.

పవన్ కళ్యాణ్ జిల్లా నుంచి గెలిచి డిప్యూటీ సీఎం అవ్వడం ఆయన అదృష్టమని, రైతుల వద్దకు రాకపోవడం రైతుల దురదృష్టమని బొత్స సత్యనారాయణ వ్యాఖ్యానించారు. తమ తాబేదారులకు బకాయిలు చెల్లించుకోవడానికి తమకు అభ్యంతరం లేదని, కేంద్రంలో మీ ప్రభుత్వమే ఉందని, చిత్తశుద్ధి లేదా అని ఆయన ప్రశ్నించారు. సో కాల్డ్ కేంద్ర మంత్రి ఉద్దానంకు ఏం చేశారని ఆయన నిలదీశారు. సీపీఎస్ రద్దు ఏమైందని ఉద్యోగులు ప్రభుత్వాన్ని అడుగుతున్నారని ఆయన వ్యాఖ్యానించారు.

English summary

AP's Economy Heading Towards Pakistan-Like State: Botsa Satyanarayana's Shocking Claim.