YSRCP ఆస్తులు, ఆదాయం ఎంతో తెలుసా?

Published: Tuesday, December 27, 2022, 16:17 [IST]

ఏపీలో అధికారంలో ఉన్న యువజన శ్రామిక రైతు కాంగ్రెస్‌ పార్టీకి (వైఎస్ఆర్ సీపీ) గత ఏడాదితో పోల్చితే ఈ ఏడాది ఆదాయం తగ్గింది. 13 శాతానికి పైగా ఆదాయం తగ్గినట్లుగా ఓ నివేదిక ద్వారా వెల్లడైంది. రాజకీయ పార్టీలు ఆ నివేదికనే స్వయంగా కేంద్ర ఎన్నికల సంఘానికి సమర్పించాయి. వైఎస్ఆర్ సీపీ సమర్పించిన నివేదిక ప్రకారం.. 2022 మార్చి 31తో ముగిసిన ఆర్థిక సంవత్సరంలో రూ.93.72 కోట్ల ఆదాయం రాగా, గతేడాది ఆదాయంతో పోలిస్తే సుమారు 13.21 శాతం తరుగు ఉన్నట్లు తేలింది.

వైఎస్ఆర్ కాంగ్రెస్ పార్టీ కేంద్ర ఎన్నికల సంఘానికి సమర్పించిన నివేదికలో ఇంకా ఏమున్నాయంటే.. 2021లో ఎలక్టోరల్‌ బాండ్ల రూపంలో వైసీపీకి రూ.96.25 కోట్ల ఆదాయం రాగా, ఈ సారి రూ.60 కోట్లే వచ్చింది. ఎలక్టోరల్‌ ట్రస్టుల నుంచి వచ్చిన ఆదాయం అంతకుముందు ఏమీ లేకపోయినప్పటికీ ఈ ఏడాది రూ.20 కోట్లకు చేరింది. ఖర్చులన్నీ పోగా పార్టీకి నికరంగా రూ.92.72 కోట్ల ఆదాయం వచ్చింది. రూ.250 కోట్ల ఓపెనింగ్‌ బ్యాలెన్స్‌తో కలిపితే 2022 మార్చి 31నాటికి పార్టీ జనరల్‌ ఫండ్‌కు రూ.343 కోట్లు అయ్యింది.