వైఎస్ విగ్రహానికి నిప్పు: విద్యార్థుల అసెంబ్లీ ముట్టడి

By Pratap

Published: Saturday, January 4, 2014, 12:43 [IST]

హైదరాబాద్: రాష్ట్ర రాజధాని హైదరాబాదులో స్వర్గీయ వైయస్ రాజశేఖర రెడ్డి విగ్రహానికి గుర్తు తెలియని వ్యక్తులు నిప్పు పెట్టారు. ఈ సంఘటన అడిక్‌మెట్‌లోని రాంనగర్ బ్రిడ్జి సమీపంలో ఈ సంఘటన చోటు చేసుకుంది. దీంతో విగ్రహం అంతా నల్లగా మారిపోయింది. ఈ సంఘటనపై వైయస్సార్ కాంగ్రెసు పార్టీ నాకులు శనివారం ఉదయం పోలీసులకు ఫిర్యాదు చేశారు. పోలీసులు కేసు నమోదు చేసుకుని దర్యాప్తు చేస్తున్నారు.

ఇదిలావుంటే, అసెంబ్లీ ముట్టడికి తెలంగాణ విద్యార్థి నేతలు శనివారం ఉదయం యత్నించారు. నిజాం కాలేజి విద్యార్థులు, తెలంగాణ స్టూడెంట్ జేఏసీ విద్యార్థులు అసెంబ్లీ ముట్టడికి యత్నించగా వారిని పోలీసులు అరెస్ట్ చేసి పోలీస్‌స్టేషన్‌కు తరలించారు. తెలంగాణ బిల్లుపై చర్చ జరగాలని వారు డిమాండ్ చేశారు.

రెండోసారీ వాయిదా

శాసనసభ సమావేశాల్లో రెండోసారి సమావేశమైన తర్వాత కూడా పరిస్థితిలో మార్పు రాలేదు. మొదటి సారి వాయిదా అనంతరం తిరిగి ప్రారంభమైన సభలో ఇరు ప్రాంతాల శాసనసభ్యులు నిరసన, నినాదాలకు దిగారు. సభ కొనసాగేలా సభ్యుల సహకరించాలని స్పీకర్ కోరినప్పటికీ పరిస్థితులో మార్పు లేకపోవడంతో సభను మరోసారి గంటపాటు వాయిదా వేశారు.

మొదటి సారి కేవలం నాలుగు నిమిషాలు, రెండో సారి ఒకటిన్న నిమిషం మాత్రమే సభ కొనసాగింది. శుక్రవారంనాడు కూడా శాసనసభా కార్యక్రమాలు సాగలేదు.

Published On January 4, 2014