Asia Cup 2023: సూపర్ 4 మ్యాచ్‌లపై తుది నిర్ణయం ఇదే..

కొలంబో: ఆసియా కప్ 2023.. ఆశించిన స్థాయిలో బజ్ ఇవ్వలేకపోతోంది. భారత్- పాకిస్తాన్ తలపడుతున్న ఈ టోర్నమెంట్ రసవత్తరంగా సాగుతుందని భావించిన అభిమానులను నిరాశలో ముంచెత్తుతోంది. సుదీర్ఘకాలం తరువాత తన చిరకాల ప్రత్యర్థి పాకిస్తాన్‌తో భారత్ తలపడిన మ్యాచ్.. అట్టర్ ఫ్లాప్ అయింది. ఒక ఇన్నింగ్ మొత్తం రద్దయింది.

దీనికి కారణం- వర్షం. ఆసియా కప్ లీగ్ దశలో భారత్- పాకిస్తాన్ మ్యాచ్‌కు ఆతిథ్యాన్ని ఇచ్చిన పల్లెకెలె స్టేడియం భారీ వర్షానికి తడిచి ముద్దయింది. ఓ చిన్నపాటి చెరువును తలపించింది. దీని దెబ్బకు పాకిస్తాన్ ఇన్నింగ్ మొత్తం రద్దయింది. ఒక్క బంతి కూడా పడలేదు. టీమిండియా బ్యాటింగ్ చేస్తోన్నపపుడు పడని వర్షం.. ఆ తరువాత స్టేడియాన్ని ముంచెత్తింది.

ఇదే పరిస్థితి ఇక ముందు కూడా ఉండబోతోంది. ప్రత్యేకించి- రాజధాని కొలంబో, పరిసర ప్రాంతాల్లో అతి భారీ వర్షాలు పడుతున్నాయి. ఇంకొద్ది రోజుల్లో సూపర్ 4 మ్యాచ్‌లు మొదలు కావాల్సి ఉన్న ప్రస్తుత పరిస్థితుల్లో వర్షాల తీవ్రత మరింత పెరుగుతుందని శ్రీలంక వాతావరణ కేంద్రం తెలిపింది. ఈ నెలాఖరు వరకూ మధ్య, ఉత్తర శ్రీలంక ప్రాంతాల్లో భారీ వర్షపాతం నమోదు కానున్నాయి.

అయినప్పటికీ- సూపర్ 4 మ్యాచ్‌లన్నీ కూడా కొలంబోలోని ప్రేమదాస స్టేడియంలోనే నిర్వహించాలని తుది నిర్ణయం తీసుకుంది ఆసియా క్రికెట్ కౌన్సిల్. దీనికి సంబంధించిన అధికారిక షెడ్యూల్‌ను కూడా ఈ సాయంత్రం విడుదల చేసింది. ఫైనల్ సహా సూపర్ 4 మ్యాచ్‌ల వేదికల్లో ఎలాంటి మార్పూ లేదని స్పష్టం చేసింది.

మొదట్లో- కొలంబోలో షెడ్యూల్ అయిన మ్యాచ్‌లన్నింటినీ కూడా ఏసీసీ షిఫ్ట్ చేస్తుందనే వార్తలొచ్చిన విషయం తెలిసిందే. పల్లెకెలె లేదా దంబుల్లాకు తరలించే అవకాశాలు ఉన్నాయనే ప్రచారం జరిగింది. ఆ తరువాత సూపర్ 4 మ్యాచ్‌లను హంబన్‌టొటకు షిఫ్ట్ చేయనున్నట్లూ మీడియాలో కథనాలు వెలువడ్డాయి.

వాటన్నింటికీ చెక్ పెట్టింది ఆసియా క్రికెట్ కౌన్సిల్. భారీ వర్షాలు పడే అవకాశం ఉన్నప్పటికీ..కొలంబోలోనే షెడ్యూల్ చేసింది. ఈ నెల 9, 10, 12, 14, 15 తేదీల్లో సూపర్ 4 మ్యాచ్‌లు షెడ్యూల్ అయ్యాయి. అవన్నీ కొలంబోలోనే జరుగనున్నాయి. ఇక 17వ తేదీన జరిగే ఫైనల్ మ్యాచ్ కూడా అక్కడే జరుగనుంది.

English summary

ACC officially announced that there will be no changes made to the Asia Cup 2023 schedule and venue and Colombo will host the Super 4 and final.