బీర్ లవర్స్‌కు బిగ్ షాక్: ఈ దీపావళికి తిప్పలే?

ఏ ఏడాది వాతావరణం చాలా వింతగా ఉంది. దసరా సమయంలో చాలా చోట్ల రావణుడు కాలిపోకుండా వర్షం కారణంగా కరిగిపోయాడు. ఆ తర్వాత కూడా వాతావరణం వేగంగా మారుతోంది. అక్టోబర్‌లో సగం నెల దాటినా, ఇప్పటికీ ఫ్యాన్ లేకుండా ఉండలేకపోతున్నాం. ఈ ఉక్కపోత వేడిలో ప్రజలు గొంతు తడుపుకోవడానికి బీర్ కోసం వెతుకుతున్నారు. కానీ ఇండియాలోని దేశీయ బీర్ పరిశ్రమ ప్రస్తుతం అల్యూమినియం క్యాన్ల తీవ్ర కొరతను ఎదుర్కొంటోంది. దీనికి ప్రధాన కారణం ప్రభుత్వం ఆదేశమే.

అసలేం జరిగిందంటే?
బ్రూవర్స్ అసోసియేషన్ ఆఫ్ ఇండియా డైరెక్టర్ జనరల్ వినోద్ గిరి ప్రకారం.. క్వాలిటీ కంట్రోల్ ఆర్డర్ ద్వారా ప్రభుత్వం అల్యూమినియం క్యాన్లను బీఐఎస్ సర్టిఫికేషన్ పరిధిలోకి తీసుకువచ్చింది. ఈ నిర్ణయం ఏప్రిల్ 1, 2025 నుంచి అమలులోకి వచ్చింది. ఈ ఆదేశం కారణంగా దేశంలో బీర్లతో పాటు ఇతర పానీయాలు ప్యాకేజింగ్ పరిశ్రమకు స్వల్పకాలిక సరఫరా సమస్యలు తలెత్తాయి. ముఖ్యంగా ఇండియాలో అమ్ముడయ్యే బీరులో 85 శాతం క్యాన్లలో లభించే బీర్లే కాగా.. సీసాల్లోని బీర్ వాటా కేవలం 15 శాతం మాత్రమే.

చేతులెత్తేసిన క్యాన్ల తయారీదారులు
దేశంలో అల్యూమినియం క్యాన్ల ప్రధాన సరఫరాదారులు అయిన బాల్ బేవరేజ్ ప్యాకేజింగ్ ఇండియా, క్యాన్-ప్యాక్ ఇండియా భారత్‌లోని తమ తయారీ యూనిట్లలో గరిష్ట దేశీయ సామర్థ్యాన్ని ఇప్పటికే చేరుకున్నాయి. కొత్త ఉత్పత్తి లైన్లను ఏర్పాటు చేసే వరకు కనీసం 6 నుంచి 12 నెలల వరకు సరఫరాను పెంచలేమని ఈ కంపెనీలు చెబుతున్నాయి. అంతకుముందు విదేశీ సరఫరాదారుల నుంచి క్యాన్ల సప్లై సులభంగా లభించేది.

దిగుమతుల్లో ఇబ్బందులు
క్వాలిటీ కంట్రోల్ ఆర్డర్ అమలులోకి రావడంతో భారతీయ బీర్ పరిశ్రమ విదేశీ విక్రేతల నుంచి బీర్ క్యాన్లను దిగుమతి చేసుకోలేని పరిస్థితి ఏర్పడింది. ఎందుకంటే విదేశీ సరఫరాదారులు భారతీయ ప్రమాణాల బ్యూరో(BIS) నుంచి సర్టిఫికేషన్ పొందితేనే దిగుమతి సాధ్యమవుతుంది. బీఐఎస్ సర్టిఫికేషన్ పొందడానికి నెలల సమయం పడుతుందని పరిశ్రమ నిపుణులు చెబుతున్నారు. అందుకే బ్రూవర్స్ అసోసియేషన్ ఆఫ్ ఇండియా క్వాలిటీ కంట్రోల్ ఆర్డర్ నిబంధనలలో కొంత సడలింపు ఇవ్వాలని ప్రభుత్వాన్ని డిమాండ్ చేసింది.

ప్రభుత్వానికి కూడా నష్టం వాటిల్లే అవకాశం
ఈ క్యాన్ సరఫరా కొరతను అధిగమించకపోతే.. ఇది బీర్ లభ్యతపై ప్రభావం చూపడమే కాకుండా, ప్రభుత్వ ఆదాయంపై కూడా ప్రతికూల ప్రభావం చూపుతుందని పరిశ్రమ అభిప్రాయపడుతోంది. బీర్ క్యాన్ల కొరత కారణంగా సంవత్సరానికి 12 నుండి 13 కోట్ల యూనిట్ల క్యాన్ల అమ్మకాలు ప్రభావితమవుతాయని అంచనా. దీని వల్ల ప్రభుత్వానికి దాదాపు రూ.1,300 కోట్ల ఆదాయం తగ్గే అవకాశం ఉంది. అందుకే ఈ సమస్యపై తక్షణమే దృష్టి సారించి, స్వల్పకాలిక పరిష్కారాన్ని అందించాలని బీఏఐ ప్రభుత్వాన్ని అభ్యర్థించింది. నిబంధనలలో సడలింపు ఇస్తే దిగుమతి చేసుకున్న క్యాన్ల సరఫరా సాఫీగా సాగుతుంది, ఇది దేశీయ బీర్ పరిశ్రమ వృద్ధిని కొనసాగించడానికి సహాయపడుతుంది.

స్వల్పకాలిక మినహాయింపు కోసం డిమాండ్
ఈ మార్పు దశలో సరఫరా సమస్యలను పరిష్కరించడానికి, బీఏఐ ప్రభుత్వం నుంచి 'స్వల్పకాలిక నియంత్రణ మినహాయింపు'ను కోరుతోంది. ఈ మినహాయింపు దిగుమతి చేసుకున్న క్యాన్లను ఎటువంటి అదనపు అడ్డంకులు లేకుండా మార్కెట్‌లోకి అనుమతించడానికి సహాయపడుతుంది. ఈ విషయంలో ప్రభుత్వం ఎలా స్పందిస్తుంది, బీర్ పరిశ్రమ ఆందోళనలను పరిష్కరించడానికి ఏమైనా చర్యలు తీసుకుంటుందా అనేది చూడాలి. ఈ సమస్య పరిష్కారం కేవలం బీర్ పరిశ్రమకు మాత్రమే కాకుండా, విస్తృత ఆర్థిక వ్యవస్థకు కూడా చాలా కీలకం.

English summary

India's beer industry is facing a major shortage of aluminium cans due to new BIS certification norms. With 85% of beer sold in cans, this Diwali may see dry shelves and unhappy beer lovers.