డిజిటల్ గోల్డ్ పతనం.. Bitcoin ఎందుకు కూలుతోంది?
ప్రపంచ క్రిప్టో మార్కెట్లో 2026 ఆరంభం బిట్కాయిన్కు తీవ్ర నిరాశనే మిగిల్చింది. అక్టోబర్లో $1.24 లక్షల రికార్డు స్థాయిని తాకిన బిట్కాయిన్, ఇప్పుడు దాదాపు సగం విలువ కోల్పోయి $65-67 వేల పరిధికి జారింది. ఏడాది ప్రారంభం నుంచి 20 శాతానికి పైగా పతనం నమోదవ్వగా, ట్రంప్ రెండో పదవీకాలం మొదలైన తర్వాత వచ్చిన లాభాలన్నీ ఆవిరయ్యాయి. గ్లోబల్ క్రిప్టో మార్కెట్ మొత్తం విలువ కూడా $4.3 ట్రిలియన్ నుంచి దాదాపు $2 ట్రిలియన్ తగ్గడం ఈ పతనం తీవ్రతను చాటుతోంది.
బిట్కాయిన్ను "డిజిటల్ గోల్డ్"గా పిలిచినా, ఇది పూర్తిగా పెట్టుబడిదారుల భావోద్వేగాలు, రిస్క్ ఆకలి మీద ఆధారపడి కదులుతుందన్న వాస్తవం మరోసారి బయటపడింది. ఫెడరల్ రిజర్వ్ వడ్డీ రేట్ల కోతలపై అనిశ్చితి, గ్లోబల్ లిక్విడిటీ కఠినతరం అవుతుందన్న భయాలు రిస్క్ ఆస్తులపై ఒత్తిడి పెంచాయి. ముఖ్యంగా ట్రంప్ కెవిన్ వార్ష్ను ఫెడ్ చైర్గా ఎంపిక చేయడం, ఫెడ్ బ్యాలెన్స్ షీట్ మరింత కుదించే అవకాశం ఉందన్న అంచనాలతో క్రిప్టోపై అమ్మకాలు ఊపందుకున్నాయి.
Bitcoin స్ట్రాటజీ షేర్స్..
క్రిప్టో ధరల పతనం ప్రభావం, ఈ ఆస్తులను భారీగా కలిగి ఉన్న కంపెనీల షేర్లపై తీవ్రంగా పడింది. మైక్రోస్ట్రాటజీకి చెందిన 'స్ట్రాటజీ' షేరు ఏడాదిలోనే $457 నుంచి $110 స్థాయికి కుప్పకూలింది. ఇతర క్రిప్టో-కేంద్రీకృత సంస్థలు కూడా 7-18 శాతం వరకు నష్టపోయాయి. బిట్కాయిన్ బలహీనత కారణంగా లాభ అంచనాలు తగ్గించడం, డివిడెండ్ల కోసం రిజర్వ్లు సృష్టించడం వంటి చర్యలు కంపెనీల ఆర్థిక ఒత్తిడిని సూచిస్తున్నాయి.
ఇదే సమయంలో, US స్పాట్ బిట్కాయిన్ ETFల నుంచి వరుసగా భారీ నిధుల ఉపసంహరణలు మార్కెట్ను మరింత కుదిపేశాయి. జనవరిలోనే $3 బిలియన్లకు పైగా బయటకు వెళ్లగా, గత మూడు నెలల్లో మొత్తం ఉపసంహరణలు $12 బిలియన్లను దాటాయి. ఇది సాంప్రదాయ సంస్థాగత పెట్టుబడిదారుల ఆసక్తి తగ్గుతోందన్న సంకేతంగా విశ్లేషకులు భావిస్తున్నారు. కాయిన్గ్లాస్ గణాంకాల ప్రకారం, ఒక్క రోజులోనే సుమారు $1 బిలియన్ విలువైన పొజిషన్లు లిక్విడేట్ కావడం మార్కెట్లో భయాన్ని మరింత పెంచింది.
మొత్తంగా చూస్తే, ప్రస్తుత క్రిప్టో పతనం ఒక చిన్న దిద్దుబాటు కంటే లోతైన దశలోకి వెళ్లినట్టుగా కనిపిస్తోంది. టెక్ స్టాక్స్, AI రంగంలోనూ బలహీనత ఉండటం, క్రిప్టోతో వాటి అనుబంధం వల్ల నష్టాలను పెంచుతోంది. ధరలు మరింత పడితే మైనర్లపై ఒత్తిడి, బలవంతపు అమ్మకాలు జరిగే ప్రమాదం ఉందని నిపుణులు హెచ్చరిస్తున్నారు. అందుకే, క్రిప్టోను పోర్ట్ఫోలియోలో చిన్న భాగంగానే ఉంచడం, అధిక రిస్క్ను అర్థం చేసుకుని ముందుకు వెళ్లడం అవసరమన్న సూచన ఈ పతనం ఇస్తోంది.
Click it and Unblock the Notifications
Sign in with Google