పెట్రోల్, ఇథనాల్, విద్యుత్.. ఒకే కారులో 3 ఆప్షన్లు!
ప్రపంచంలోనే ప్రముఖ ఎలక్ట్రిక్ వాహన తయారీ సంస్థ అయిన BYD(బిల్డ్ యువర్ డ్రీమ్) బ్రెజిల్ మార్కెట్ కోసం స్థానికంగా రూపొందించింది. మొదటి ఫ్లెక్స్-ఫ్యూయల్ ప్లగ్-ఇన్ హైబ్రిడ్ ఎస్యూవీని కంపెనీ అధికారికంగా పరిచయం చేసింది. ఈ కారు ప్రత్యేకత ఏమిటంటే.. ఇది కేవలం పెట్రోల్ లేదా విద్యుత్తో మాత్రమే కాకుండా ఇథనాల్తో కూడా నడుస్తుంది. బ్రెజిల్తో పాటు ఇండియా వంటి అభివృద్ధి చెందుతున్న మార్కెట్లకు కూడా ఈ టెక్నాలజీని తీసుకొచ్చే అవకాశాలు ఉన్నాయని కంపెనీ ప్రతినిధులు సంకేతాలిచ్చారు. ఈ కారు గురించి మరిన్ని వివరాలు తెలుసుకుందాం.
కారు పేరు, తయారీ నేపథ్యం
ఈ కొత్త ప్లగ్-ఇన్ హైబ్రిడ్ ఎస్యూవీకి BYD సాంగ్ ప్రో సూపర్-హిబ్రిడో ఫ్లెక్స్ ఫ్యూయల్ లేదా సాంగ్ ప్రో DM-i ఫ్లెక్స్ అని పేరు పెట్టారు. ఈ కారు బ్రెజిల్ కోసం ప్రత్యేకంగా రూపొందించబడింది. దీనిని బ్రెజిల్ మార్కెట్ అవసరాల కోసం ప్రత్యేకంగా చైనా, బ్రెజిల్లోని BYD పరిశోధన, అభివృద్ధి బృందాలు అభివృద్ధి చేశాయి. ఈ కంపెనీ బ్రెజిల్ లో ఏర్పాటు చేసిన కొత్త ప్లాంట్లో ఈ మోడల్ను భారీ పెట్టుబడితో ఉత్పత్తి చేస్తోంది.
ఈ ప్రత్యేక ఫ్లెక్స్-ఫ్యూయల్ ఇంజన్ ఎలా పనిచేస్తుంది?
ఈ కారు ఒక PHEV (ప్లగ్-ఇన్ హైబ్రిడ్ ఎలక్ట్రిక్ వెహికల్). అంటే దీనిని ఎలక్ట్రిక్ వాహనంగా ఛార్జ్ చేసి నడపవచ్చు. అవసరమైనప్పుడు దాని ఇంజన్తో కూడా శక్తిని పొందవచ్చు. దీనిలోని ఫ్లెక్స్-ఫ్యూయల్ ఇంజన్ 100 శాతం పెట్రోల్, 100 శాతం ఇథనాల్ లేదా రెండింటి మిశ్రమంతో పనిచేసే విధంగా డిజైన్ చేయబడింది. దీని టార్ వేరియంట్ ఎలాంటి ఇంధనం వాడకుండా కేవలం ఎలక్ట్రిక్ బ్యాటరీ ఆధారంగా 120 కిలోమీటర్ల వరకు రేంజ్ను అందిస్తుంది.
ఈ కారు భారతదేశానికి ఎందుకు ప్రత్యేకమైనది?
బ్రెజిల్ మాదిరిగానే భారత ప్రభుత్వం కూడా ఇథనాల్ మిశ్రమ ఇంధనాన్ని ప్రోత్సహిస్తోంది. ప్రస్తుతం ప్రభుత్వం దేశంలో E20 పెట్రోల్ను ప్రవేశపెట్టింది. ఇందులో 20% ఇథనాల్ ఉంటుంది.ఈ కారును బ్రెజిల్ కోసం తయారు చేసినప్పటికీ, భవిష్యత్తులో దీనిని ఇండియా వంటి ఇతర దేశాలకు కూడా ఎగుమతి చేయవచ్చని లేదా అక్కడ విడుదల చేయవచ్చని BYD సీనియర్ వైస్ ప్రెసిడెంట్ అలెగ్జాండర్ బాల్డి ధ్రువీకరించారు.
భారతదేశంలో BYD స్థానం
ప్రస్తుతం, తక్కువ పన్నులు, సుంకాల ప్రయోజనం పొందడానికి BYD భారతదేశంలో అట్టో 3, సీల్ మరియు eMAX 7 వంటి పూర్తి ఎలక్ట్రిక్ (EV) కార్లను మాత్రమే విక్రయిస్తోంది. అయితే ఒకవేళ ఫ్లెక్స్-ఫ్యూయల్ హైబ్రిడ్ టెక్నాలజీ భారతదేశానికి వస్తే, అది భారతీయ వినియోగదారులకు ఒక మంచి ఎంపికగా మారవచ్చు.
Click it and Unblock the Notifications
Sign in with Google