CNG vs పెట్రోల్ కార్లు.. ఏది బెస్ట్? ఏది చౌక?

CNG vs Petrol Cars: కొత్తకారును కొనుగోలు చేసేటప్పుడు చాలా మంది వాహనదారులు ఎదుర్కొనే ప్రధాన సందిగ్ధం పెట్రోల్ కారు తీసుకోవాలా? లేక సీఎన్‌జీ కారు తీసుకోవాలా? అని ఆలోచిస్తుంటారు. ముఖ్యంగా రూ.10 లక్షలలోపు బడ్జెట్ కలిగిన సామాన్య, మధ్యతరగతి ప్రజలకు ఇంధన ఖర్చు అనేది పెద్ద భారంగా మారుతోంది. పెట్రోల్ ధరలు ఆకాశాన్ని తాకుతున్న తరుణంలో సీఎన్‌జీ వాహనాలు ఓ అద్భుతమైన ప్రత్యామ్నాయంగా కనిపిస్తున్నాయి. అయితే ఈ రెండింటి మధ్య రన్నింగ్ కాస్ట్, మైలేజ్, పెర్ఫార్మెన్స్ తేడాలను లోతుగా అర్థం చేసుకోవడం చాలా ముఖ్యం.

ఇంధన ధర, రన్నింగ్ కాస్ట్
పెట్రోల్ కార్లతో పోలిస్తే సీఎన్‌జీ కార్ల నిర్వహణ ఖర్చు చాలా తక్కువ. సాధారణంగా పెట్రోల్ ధర దేశవ్యాప్తంగా లీటరుకు రూ. 100 పైనే ఉంటోంది. దానికి భిన్నంగా, సీఎన్‌జీ ధర కిలోకు రూ. 80 నుంచి రూ. 90 మధ్యలో (నగరాలను బట్టి మారుతుంది) ఉంటోంది. దీనివల్ల ప్రతి కిలోమీటరుకు అయ్యే ప్రయాణ ఖర్చు సీఎన్‌జీలో దాదాపు సగానికి సగం తగ్గుతుంది. మీరు గనుక ప్రతిరోజూ ఆఫీసుకో లేదా వ్యాపార పనులకో 50 నుంచి 100 కిలోమీటర్లు ప్రయాణించే వారైతే, నెలాఖరుకు మీరు పెట్రోల్ కంటే సీఎన్‌జీ ద్వారా వేల రూపాయలను ఆదా చేయవచ్చు.

మైలేజ్ - సీఎన్‌జీదే పైచేయి
మైలేజ్ విషయంలో సీఎన్‌జీ కార్లకు తిరుగులేదు. పెట్రోల్ కార్లు సగటున లీటరుకు 15 నుంచి 22 కిలోమీటర్ల మైలేజ్ ఇస్తే.. సీఎన్‌జీ కార్లు కిలోకు 22 నుంచి 35 కిలోమీటర్ల వరకు మైలేజ్ ఇస్తాయి. ఈ భారీ మైలేజ్ తేడానే మారుతీ సుజుకీ, టాటా, హ్యుందాయ్ వంటి కంపెనీల సీఎన్‌జీ మోడళ్లు భారీగా అమ్ముడవడానికి ప్రధాన కారణం. ఇటీవలి కాలంలో టాటా నెక్సాన్ వంటి పాపులర్ ఎస్‌యూవీలు కూడా సీఎన్‌జీ వేరియంట్లలో అందుబాటులోకి రావడం ఈ టెక్నాలజీకి ఉన్న ఆదరణను చాటిచెబుతోంది.

పర్ఫార్మెన్స్, పవర్ వ్యత్యాసం
ఆర్థికంగా సీఎన్‌జీ లాభదాయకమే అయినప్పటికీ.. పర్ఫార్మెన్స్ విషయంలో కొన్ని పరిమితులు ఉంటాయి. సీఎన్‌జీ ఇంధనంపై కారు నడుస్తున్నప్పుడు ఇంజిన్ ఉత్పత్తి చేసే పవర్, టార్క్.. పెట్రోల్ మోడ్‌తో పోలిస్తే కొంచెం తక్కువగా ఉంటుంది. దీనివల్ల కారును వేగంగా పికప్ చేయడం లేదా భారీ లోడ్ ఉన్నప్పుడు కొండ ప్రాంతాల్లో నడపడం పెట్రోల్ కారుతో పోలిస్తే కొంచెం కష్టంగా అనిపించవచ్చు. అందుకే వేగం, పవర్ కోరుకునే వారు పెట్రోల్ వైపు, పొదుపు కోరుకునే వారు సీఎన్‌జీ వైపు మొగ్గు చూపుతారు.

మార్కెట్లో అందుబాటులో ఉన్న ఉత్తమ ఎంపికలు
ప్రస్తుతం భారత మార్కెట్లో దాదాపు అన్ని విభాగాల్లోనూ సీఎన్‌జీ కార్లు అందుబాటులో ఉన్నాయి. తక్కువ బడ్జెట్‌లో ఆల్టో, వ్యాగన్ఆర్, సెలేరియో వంటి హ్యాచ్‌బ్యాక్ కార్లు ఉండగా.. ప్రీమియం అనుభవం కోసం స్విఫ్ట్, బలెనో, ఆల్ట్రోజ్ వంటి కార్లు ఉన్నాయి. ఇక ఎస్‌యూవీ ప్రియుల కోసం టాటా పంచ్, నెక్సాన్, మారుతీ బ్రెజ్జా వంటి అద్భుతమైన మోడల్స్ ఉన్నాయి. పెద్ద కుటుంబం ఉన్నవారు 7 సీటర్ విభాగంలో మారుతీ ఎర్టిగా సీఎన్‌జీని కళ్లు మూసుకుని ఎంచుకోవచ్చు. మీ అవసరానికి తగిన కారును ఎంచుకునే ముందు టెస్ట్ డ్రైవ్ చేయడం ఎల్లప్పుడూ మంచిది.

English summary

Confused between CNG and Petrol cars? Read our detailed analysis on mileage, running costs, and engine performance to make the right choice for your next car.