అనిల్ అంబానీకి ఈడీ షాక్: రూ.7,500 కోట్ల ఆస్తులు జప్తు!

రిలయన్స్ గ్రూప్ ఛైర్మన్ అనిల్ అంబానీకి మనీలాండరింగ్ నిరోధక చట్టం(PMLA) కింద ఎన్‌ఫోర్స్‌మెంట్ డైరెక్టరేట్ (ఈడీ) భారీ షాక్ ఇచ్చింది. రిలయన్స్ గ్రూప్‌నకు చెందిన రూ.7,500 కోట్లకు పైగా విలువైన ఆస్తులను ఈడీ తాత్కాలికంగా జప్తు చేసింది. ఈ చర్యలో భాగంగా ముంబైలోని ఆయన నివాసం, ఢిల్లీలోని కీలక స్థలంతో పాటు దేశంలోని ప్రధాన నగరాల్లోని ఆస్తులను స్వాధీనం చేసుకున్నారు.

ఆస్తుల జప్తు వివరాలు
ఈడీ జారీ చేసిన తాత్కాలిక అటాచ్‌మెంట్ ఉత్తర్వుల ప్రకారం.. జప్తు చేయబడిన ఆస్తుల విలువ మొత్తం రూ.7,500 కోట్లుగా ఉంది. వీటిలో ముఖ్యమైనవి ఏంటంటే.. రిలయన్స్ కమ్యూనికేషన్స్ లిమిటెడ్ (RCOM) బ్యాంకు మోసం కేసులో భాగంగా నవీ ముంబైలోని ధీరూభాయ్ అంబానీ నాలెడ్జ్ సిటీ (DAKC)లోని రూ.4,462 కోట్ల విలువైన 132 ఎకరాల భారీ భూమిని ఈడీ అటాచ్ చేసింది. ఇందులో ముంబైలోని పాలి హిల్ ప్రాంతంలో ఉన్న రూ.3,084 కోట్ల విలువైన అనిల్ అంబానీ నివాసం, ఢిల్లీలోని రిలయన్స్ సెంటర్‌కు చెందిన ప్లాట్ ఉన్నాయి. ఢిల్లీ, నోయిడా, ఘజియాబాద్, ముంబై, పుణె, థానే, హైదరాబాద్, చెన్నై, తూర్పు గోదావరి వంటి పలు ప్రధాన నగరాల్లోని నివాస, వాణిజ్య ఆస్తులు కూడా జప్తు జాబితాలో ఉన్నాయి.

నిధుల మళ్లింపుపై దర్యాప్తు
ఈ కేసు ప్రధానంగా రిలయన్స్ హోమ్ ఫైనాన్స్ లిమిటెడ్ (RHFL), రిలయన్స్ కమర్షియల్ ఫైనాన్స్ లిమిటెడ్ (RCFL) ద్వారా సేకరించిన ప్రజా నిధులను దారి మళ్లించడం, అక్రమంగా తరలించడం వంటి ఆరోపణలకు సంబంధించినది. 2017-2019 మధ్య కాలంలో, యెస్ బ్యాంక్ RHFL, RCFLలలో సుమారు రూ.5,010 కోట్లు (₹2,965 కోట్లు + ₹2,045 కోట్లు) పెట్టుబడి పెట్టింది. అయితే, 2019 డిసెంబర్ నాటికి ఈ పెట్టుబడులు నిరర్థక ఆస్తులుగా (NPA) మారాయి. రిలయన్స్ ఇన్‌ఫ్రాస్ట్రక్చర్‌తో సహా పలు గ్రూప్ కంపెనీలు రూ.17,000 కోట్లకు పైగా ఆర్థిక అవకతవకలు, రుణాల మళ్లింపునకు పాల్పడినట్లు ఆరోపణలు ఉన్నాయి.

సెబీ నిబంధనల కారణంగా మ్యూచువల్ ఫండ్స్ నేరుగా గ్రూప్ కంపెనీలలో పెట్టుబడి పెట్టడం సాధ్యం కాకపోవడంతో, ఆ నిధులను యెస్ బ్యాంక్ ద్వారా అక్రమంగా మళ్లించి, అనిల్ అంబానీ గ్రూప్ కంపెనీలకు తరలించారని ఈడీ దర్యాప్తులో గుర్తించారు. ఈ కేసుకు సంబంధించి అనిల్ అంబానీని ఈ ఏడాది ఆగస్టులో ఈడీ ప్రశ్నించింది. అలాగే జులైలో ఆయన గ్రూప్‌కు చెందిన 35 ప్రాంగణాల్లో సోదాలు నిర్వహించింది.

రిలయన్స్ ఇన్‌ఫ్రా స్పందన
ఈడీ తీసుకున్న చర్యలపై రిలయన్స్ ఇన్‌ఫ్రాస్ట్రక్చర్ స్పందించింది. తాజా చర్యల వల్ల తమ వ్యాపార కార్యకలాపాలపై ఎటువంటి ప్రభావం ఉండదని కంపెనీ స్పష్టం చేసింది. గత మూడున్నర ఏళ్లుగా అనిల్ అంబానీ రిలయన్స్ ఇన్‌ఫ్రాస్ట్రక్చర్ బోర్డులో లేరని కూడా కంపెనీ స్టాక్ ఎక్స్ఛేంజీలకు దాఖలు చేసిన పత్రాల్లో పేర్కొంది. ఈ మొత్తం దర్యాప్తు దేశంలోని అతిపెద్ద ఆర్థిక మోసాలలో ఒకటిగా పరిగణించబడుతోంది. ఈడీ చేసిన ఆస్తుల జప్తు చట్టపరమైన చర్యలలో ఒక కీలకంగా నిలిచింది.

అనిల్ అంబానీ గ్రూప్ షేర్లు పతనం!
రిలయన్స్ గ్రూప్ ఛైర్మన్ అనిల్ అంబానీకి చెందిన ఆస్తులపై ఎన్‌ఫోర్స్‌మెంట్ డైరెక్టరేట్ భారీ చర్యలు తీసుకోవడంతో, రిలయన్స్ పవర్, రిలయన్స్ ఇన్‌ఫ్రాస్ట్రక్చర్ వంటి రిలయన్స్ ఏడీఏజీ (ADAG) గ్రూప్ కంపెనీల షేర్లు సోమవారం స్టాక్ మార్కెట్‌లో పడిపోయాయి. రిలయన్స్ పవర్ షేరు ధర నేడు (సోమవారం) 5.73% నష్టపోయి ఒక్కో షేరు రూ.43.76 వద్ద ట్రేడ్ అయింది. అలాగే, రిలయన్స్ ఇన్‌ఫ్రాస్ట్రక్చర్ షేరు ధర కూడా 4.99% పతనమై ₹203.85 వద్ద ట్రేడ్ అయింది. ఈడీ తీసుకున్న తాజా చర్యల కారణంగా ఇన్వెస్టర్లలో ఆందోళన పెరిగి, అమ్మకాలు వెల్లువెత్తడంతో ఈ పతనం సంభవించింది.

English summary

ED has temporarily attached assets worth Rs.7,500 crore of Anil Ambani and his Reliance Group companies in connection with a money laundering case under the PMLA. Major properties.