EPFO UPI withdrawal: ట్రయల్ రన్ స్టార్ట్! ఏకంగా 75 శాతం డబ్బులు డ్రా..
అత్యవసర సమయంలో లేదా అవసరాల కోసం ప్రావిడెంట్ ఫండ్ డబ్బులు డ్రా చేసుకోవడం ఇకపై మరింత సులభం కానుంది. ఇప్పటివరకు పీఎఫ్ విత్‌డ్రా కోసం అప్లై చేసుకుని, అది ప్రాసెస్ అయ్యి బ్యాంకు ఖాతాలో పడేవరకు రోజులు తరబడి వేచి చూడాల్సి వచ్చేది. కానీ ఇకపై అలా వేచి చూడాల్సిన పనిలేకుండా, మన దైనందిన జీవితంలో నిమిషాల్లో జరిపే 'యూపీఐ' (UPI) లావాదేవీల ద్వారానే పీఎఫ్ డబ్బులను నేరుగా పొందేందుకు ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) రంగం సిద్ధం చేస్తోంది.
బ్యాంకులతో కలిసి ట్రయల్ రన్ స్టార్ట్!
పాపులర్ డిజిటల్ పేమెంట్ విధానమైన యూపీఐ ద్వారా పీఎఫ్ ఉపసంహరణ సదుపాయాన్ని తీసుకురావడానికి ఈపీఎఫ్ఓ ఇప్పటికే ప్రముఖ బ్యాంకులతో కలిసి ప్రయోగాత్మక పరిశీలనలు (Testing) ప్రారంభించింది. ఈ సేవలను వచ్చే డిసెంబర్ నెలాఖరు నాటికి పూర్తిస్థాయిలో చందాదారులకు అందుబాటులోకి తీసుకురావాలని అధికార యంత్రాంగం భావిస్తోంది. ఈ కొత్త విధానం అమల్లోకి వస్తే దేశవ్యాప్తంగా ఉన్న దాదాపు 30 కోట్ల మంది ఈపీఎఫ్ఓ చందాదారులకు డిజిటల్ రూపంలో విప్లవాత్మకమైన సేవలు లభించినట్లవుతుంది.
UAN పోర్టల్‌తో యూపీఐ లింక్
ప్రస్తుతం పీఎఫ్ డబ్బులు విత్‌డ్రా చేయాలంటే చందాదారులు 'యూఏఎన్' (UAN) పోర్టల్‌లోకి వెళ్లి క్లెయిమ్ నమోదు చేయాల్సి ఉంటుంది. ఆ ప్రక్రియ అంతా పూర్తయిన తర్వాత ఈపీఎఫ్ఓ సిబ్బంది దాన్ని పరిశీలించి, అనుమతించాక సదరు మొత్తాన్ని చందాదారుడి బ్యాంకు ఖాతాకు జమ చేస్తారు. అయితే నూతన విధానంలో UAN పోర్టల్ నేరుగా సబ్‌స్క్రైబర్ల యూపీఐ ఐడీతో అనుసంధానమవుతుంది. దీనివల్ల మధ్యలో సమయం వృథా కాకుండా నేరుగా ఖాతాల్లోకి నగదు వేగంగా జమ అయ్యే అవకాశముంది.
ప్రత్యేక యాప్‌తో భీమ్ (BHIM) అనుసంధానం
చందాదారుల బ్యాంకు ఖాతాలను సులభంగా అనుసంధానించేందుకు ఈపీఎఫ్ఓ ఒక కొత్త యాప్‌ను కూడా తీసుకురాబోతోంది. ఈ యాప్ కేంద్ర ప్రభుత్వపు 'భీమ్' (BHIM) యాప్‌తో పాటు ఇతర ప్రముఖ యూపీఐ యాప్‌లతో కూడా అనుసంధానమై పనిచేస్తుంది. దీని ద్వారా యూజర్లు తమ మొబైల్ ఫోన్ల నుంచే సులభంగా విత్‌డ్రా అభ్యర్థనలను పంపుకోవచ్చు.
ఎంత వరకు డ్రా చేసుకోవచ్చు?
యూపీఐ ద్వారా విత్‌డ్రా సదుపాయం వచ్చినప్పటికీ నిబంధనల ప్రకారం కొంత పరిమితి ఉంటుంది. సబ్‌స్క్రైబర్లు తమ ఖాతాలోని మొత్తం బ్యాలెన్స్‌లో గరిష్టంగా 75 శాతం వరకు మాత్రమే యూపీఐ ద్వారా డ్రా చేసుకోవడానికి అర్హత పొందుతారు. పిల్లల చదువులు, వివాహాలు, ఇల్లు లేదా స్థలం కొనుగోలు, వైద్య అత్యవసరాలు వంటి ప్రత్యేక కారణాల నిమిత్తం ఈ 75 శాతం మేర విత్‌డ్రా చేసుకోవచ్చు.
మిగిలిన 25 శాతానికి ట్యాక్స్ ఫ్రీ వడ్డీ!
అత్యవసరాల కోసం ఎంత డ్రా చేసుకున్నా, నిబంధనల ప్రకారం ఖాతాలోని మొత్తం నిధిలో కనీసం 25 శాతం బ్యాలెన్స్ నిల్వ ఉండాల్సిందే. ఈ మిగిలిన 25 శాతం సొమ్ము చందాదారుడి పీఎఫ్ ఖాతాలోనే భద్రంగా ఉండి, దానిపై ప్రభుత్వం అందించే పన్ను రహిత వడ్డీ యథావిధిగా జమ అవుతూ ఉంటుంది. భవిష్యత్తు రిటైర్మెంట్ అవసరాలకు భద్రత కల్పిస్తూనే, తక్షణ అవసరాలకు యూపీఐ ద్వారా వేగంగా డబ్బులు పొందే వెసులుబాటును ఈ కొత్త విధానం అందిస్తోంది.
కాగా, ప్రస్తుతం ఈపీఎఫ్ఓ వద్ద దాదాపు రూ. 26 లక్షల కోట్ల భారీ కార్పస్ నిధి ఉండగా, ప్రతినెల క్రమం తప్పకుండా చందా చెల్లించే యాక్టివ్ చందాదారుల సంఖ్య సుమారు 7.5 కోట్లుగా ఉంది.
Click it and Unblock the Notifications
Sign in with Google
