వీడు మామూలోడు కాదు.. టాయిలెట్ సీటుపై కూర్చుని కోట్లు
కాదేది కంటెంట్ క్రియేషన్ కు అనర్హం అన్నట్లు ఉంది ప్రస్తుతం జనరేషన్ పరిస్థితి. నిక్ గ్రీనాల్ట్ అనే వ్యక్తి తన ఉద్యోగం మానేసి కంటెంట్ క్రియేటర్గా మారినప్పుడు, ఏదో ఒకటి వెరైటీగా చేయాలనుకున్నాడు. తన ఇంట్లోని బాత్రూమ్ను బ్రాండ్ల ప్రచార వేదికగా మారుస్తానని ప్రకటించాడు. మొదట్లో ఇదొక జోక్ అనుకున్నారంతా.. కానీ ఇప్పుడు టాప్ కంపెనీలు తమ యాడ్స్ అక్కడ కనిపించాలని పోటీ పడుతున్నాయి. ఏకంగా ఒక మిలియన్ డాలర్లు (సుమారు రూ.8.3 కోట్లు) సంపాదించడమే లక్ష్యంగా నిక్ ఈ వింత వ్యాపారాన్ని సాగిస్తున్నాడు.
ఎవరు ఎక్కువ ఇస్తే వారే 'కింగ్'!
నిక్ తన టాయిలెట్ స్థలాన్ని వేలం వేయడం మొదలుపెట్టాడు. ఎవరైతే అత్యధిక ధర చెల్లిస్తారో వారికే "కింగ్ ఆఫ్ ది థ్రోన్" (సింహాసనానికి రాజు) అనే బిరుదు దక్కుతుంది. ఈ పోరులో మొదట 'డ్యూడ్వైప్స్' అనే సంస్థ సుమారు రూ.7.5 లక్షలు చెల్లించి ముందంజలో ఉండగా, తాజాగా డాక్టర్ స్క్వాచ్ అనే బ్రాండ్ ఏకంగా $10,000 (సుమారు రూ.9.4 లక్షలు) చెల్లించి ఆ గౌరవాన్ని దక్కించుకుంది. క్లోరాక్స్, పైన్-సోల్ వంటి దిగ్గజ బ్రాండ్లు కూడా ఈ 'టాయిలెట్ రియల్ ఎస్టేట్'లో చోటు సంపాదించుకోవడం విశేషం.
టాయిలెట్ యాడ్ వల్ల లాభం ఏంటి?
పైకి ఇది డబ్బు వృధా అనిపించినా, కంపెనీలు మాత్రం ఫలితాలను చూసి షాక్ అవుతున్నాయి. క్రిప్టో సంస్థ 'మూన్పే' తమ ప్రకటనను నిక్ టాయిలెట్పై వేయగా, కేవలం కొద్ది రోజుల్లోనే ఇన్స్టాగ్రామ్లో 10 లక్షల వ్యూస్, వేలల్లో కొత్త ఫాలోవర్లు వచ్చారు. "సూపర్ బౌల్ (అమెరికాలో పెద్ద ఈవెంట్) కంటే మాకు ఇదే పెద్ద అడ్వర్టైజ్మెంట్" అని ఆ సంస్థ యజమాని ఫిబ్రవరి 4, 2026న సంతోషంగా పోస్ట్ చేశారు. అతి తక్కువ ఖర్చుతో ఇంతటి వైరల్ ప్రచారం దక్కడం మార్కెటింగ్ ప్రపంచంలో ఒక సంచలనం.
నిరుద్యోగిలా నటిస్తున్న 'మేధావి'
నిక్ ఏదో సరదాగా చేస్తున్నాడని అనుకుంటే పొరపాటే! నిక్ గ్రీనాల్ట్ ఒక అనుభవజ్ఞుడైన మోషన్ డిజైనర్ మరియు కంటెంట్ స్ట్రాటజిస్ట్. గతంలో NBA, అట్లాంటిక్ వంటి దిగ్గజ సంస్థలతో పనిచేశాడు. తన గురించి తాను 'నిరుద్యోగి' అని చెప్పుకుంటూ వినూత్నమైన వీడియోలు చేస్తూ జనాన్ని ఆకర్షిస్తున్నాడు. "తన అడ్వర్టైజ్మెంట్ల కోసమే తానే ఒక అడ్వర్టైజ్మెంట్ చేసుకుంటున్న మేధావి" అని నెటిజన్లు అతడిని కొనియాడుతున్నారు.
బ్రాండ్ల మధ్య ఫన్నీ వార్
ఈ ప్రచారంపై మైక్రోసాఫ్ట్ వంటి సంస్థలు సైతం 'చిత్రమైన గౌరవం' అంటూ కామెంట్ చేశాయి. "మా డబ్బును కడిగేయడానికి సిద్ధంగా ఉన్నాం" అని పైన్-సోల్ జోక్ చేయగా, మోనోపాలి గేమ్ సంస్థ 'ఇది ఉచిత రియల్ ఎస్టేట్' అని చమత్కరించింది. మొత్తానికి హాస్యాన్ని, బిజినెస్ను కలిపి నిక్ గ్రీనాల్ట్ చేస్తున్న ఈ 'బాత్రూమ్ బిజినెస్' ఇప్పుడు ప్రపంచవ్యాప్తంగా చర్చనీయాంశంగా మారింది.
Click it and Unblock the Notifications
Sign in with Google