Work From Home : వర్క్ ఫ్రమ్ హోమ్ ప్రకటించిన తొలి బ్యాంకు ఇదే..!
HDFC Bank : ఐటీ ఉద్యోగులకేనా.. మాకూ వర్క్ ఫ్రమ్ హోమ్ కావాలంటూ ముచ్చటపడే బ్యాంకింగ్ రంగానికి హెచ్డీఎఫ్సీ బ్యాంక్ అదిరిపోయే గుడ్ న్యూస్ చెప్పింది. దేశీయ ప్రైవేట్ రంగానికి చెందిన ఈ బ్యాంకింగ్ దిగ్గజం, తన ఉద్యోగుల కోసం సరికొత్త 'హైబ్రిడ్ వర్క్ మోడల్'ను తెరపైకి తెచ్చింది. కాలంతో పాటు మారుతున్న కార్పొరేట్ సంస్కృతికి అద్దం పడుతూ, ఉద్యోగుల సంక్షేమానికి పెద్దపీట వేసేలా ఈ వినూత్న నిర్ణయం తీసుకుంది.
ఇటీవల ప్రధాని నరేంద్ర మోడీ దేశంలో చమురు సంక్షోభాన్ని అరికట్టడానికి, ఇంధన పొదుపును పాటించాల్సిన అవసరం గురించి స్పష్టంగా వివరించారు. ఇందులో భాగంగానే వీలైనంత వరకు సంస్థలు తమ ఉద్యోగులకు వర్క్ ఫ్రమ్ హోమ్ సదుపాయాన్ని కల్పించాలని ఆయన పిలుపునిచ్చారు. ప్రధాని ఇచ్చిన ఈ సలహాను అందిపుచ్చుకున్న హెచ్డీఎఫ్సీ బ్యాంక్, తక్షణమే రంగంలోకి దిగి ఈ సరికొత్త హైబ్రిడ్ విధానాన్ని ప్రకటించింది.
ఈ కొత్త పాలసీ ప్రకారం, బ్యాంకులోని బిజినెస్ , కార్పొరేట్ సపోర్ట్ విభాగాల్లో పనిచేసే ఎంపిక చేసిన ఉద్యోగులకు వారంలో రెండు రోజుల పాటు ఇంటి నుంచే పనిచేసే వెసులుబాటు కలుగుతుంది. ముఖ్యంగా కస్టమర్లతో నేరుగా సంబంధం లేకుండా, తెర వెనుక ఉండి బ్యాంకు చక్రాలను నడిపించే ఇంటర్నల్ విభాగాలు అయిన హ్యూమన్ రీసోర్సెస్, ఫైనాన్స్, ట్రెజరీ ఆపరేషన్స్, బ్యాంకు లావాదేవీలను పర్యవేక్షించే ఉద్యోగులకు ఈ సువర్ణ అవకాశం లభించనుంది.
అయితే ఈ కీలక నిర్ణయం కేవలం కాగితాలకే పరిమితం కాలేదు. ఇది ఇప్పటికే అమల్లోకి వచ్చేసింది. ప్రస్తుతానికి వచ్చే ముప్పై రోజుల పాటు ఈ విధానాన్ని ఒక ట్రయల్ రన్ లాగా ప్రయోగాత్మకంగా పరిశీలించనున్నారు. ఈ ముప్పై రోజుల పనితీరు, ఉత్పాదకత ఆధారంగా పరిస్థితులను సమీక్షించి, ఆ తర్వాత ఈ హైబ్రిడ్ మోడల్ను శాశ్వతంగా కొనసాగించాలా లేదా అనే దానిపై బ్యాంకు యాజమాన్యం తుది నిర్ణయం తీసుకోనుంది.
ఈ మార్పు విన్న కస్టమర్లకు ఒక చిన్న సందేహం రావచ్చు. మరి బ్యాంకుకు వెళ్తే మా పనులు ఎలా అవుతాయి? అనే ప్రశ్న తలెత్తడం సహజం. దీనిపై హెచ్డీఎఫ్సీ బ్యాంక్ ముందే స్పష్టత ఇచ్చింది. ఈ హైబ్రిడ్ విధానం కేవలం అంతర్గత విభాగాలకే వర్తిస్తుందని, రోజువారీ కస్టమర్లతో నేరుగా లావాదేవీలు జరిపే ఫ్రంట్ ఆఫీస్ లేదా బ్రాంచ్ ఉద్యోగులపై దీని ప్రభావం ఏమాత్రం ఉండదని స్పష్టం చేసింది. కాబట్టి వినియోగదారులకు అందించే బ్యాంకింగ్ సేవల్లో ఎలాంటి అంతరాయం ఉండబోదని, సేవలు ఎప్పటిలాగే వేగంగా, సజావుగా సాగుతాయని బ్యాంకు భరోసా ఇచ్చింది.
Click it and Unblock the Notifications
Sign in with Google