Health Insurance: తక్కువ ప్రీమియం.. పెద్ద మోసం!

ఈ రోజుల్లో ఆరోగ్య బీమా (Health Insurance) ప్రాణరక్షక కవచంలా మారింది. అయితే, పాలసీ తీసుకునేటప్పుడు మనం చేసే అతి పెద్ద తప్పు.. ఏ కంపెనీ తక్కువ ప్రీమియం వసూలు చేస్తోందో చూసి గుడ్డిగా దానిని ఎంచుకోవడం. కేవలం కొన్ని వేల రూపాయల ప్రీమియం ఆదా చేయాలనే మీ ఆలోచన, రేపు పొద్దున ఆసుపత్రిలో చేరినప్పుడు లక్షల రూపాయల భారంగా మారుతుందని మీకు తెలుసా? ముఖ్యంగా మీరు నివసించే నగరం మారితే, మీ బీమా ప్రీమియం ఏకంగా 50 శాతం వరకు పెరిగే అవకాశం ఉందన్న చేదు నిజాన్ని నిపుణులు వెల్లడిస్తున్నారు.

మనం నివసించే ఊరు మారితే ప్రీమియం ఎందుకు పెరుగుతుంది? ఇది బీమా కంపెనీల ఇష్టారాజ్యం కాదు.. దీని వెనుక ఒక పక్కా లెక్క ఉంది. మెట్రో నగరాల్లో వైద్య ఖర్చులు చిన్న పట్టణాల కంటే చాలా ఎక్కువగా ఉంటాయి. ఉదాహరణకు, సాధారణంగా చేసే అపెండిసైటిస్ ఆపరేషన్‌కు చిన్న పట్టణంలో రూ.80 వేల నుంచి లక్ష రూపాయలు ఖర్చయితే, అదే ఢిల్లీ లేదా ముంబై వంటి నగరాల్లో రూ.2 లక్షలకు పైగానే అవుతుంది. అందుకే, మీరు ఉండే చోటును బట్టి బీమా సంస్థలు మీ 'రిస్క్'ను అంచనా వేస్తాయి.

జోనింగ్ మ్యాజిక్.. లక్నోకు ఒక ధర, ఢిల్లీకి మరో ధర!

పాలసీబజార్ నిపుణుల లెక్క ప్రకారం.. ఒకే కవరేజీ ఉన్న పాలసీకి 25 ఏళ్ల యువకుడు లక్నోలో రూ.10,012 ప్రీమియం చెల్లిస్తే, అదే వ్యక్తి ఢిల్లీలో ఉంటే రూ.15,111 కట్టాల్సి వస్తుంది. అంటే కేవలం ఏరియా మారినందుకే 50 శాతం భారం పెరుగుతుంది. బీమా కంపెనీలు దేశాన్ని కొన్ని 'జోన్ల'గా విడగొట్టాయి.

• జోన్ 1: ఢిల్లీ NCR, ముంబై వంటి ఖరీదైన మెట్రోలు.
• జోన్ 2: హైదరాబాద్, జైపూర్, పూణే, అహ్మదాబాద్ వంటి టైర్-1 నగరాలు.
• జోన్ 3: చిన్న పట్టణాలు, గ్రామీణ ప్రాంతాలు.
• మీరు ఉండే నగరాన్ని బట్టి ఈ ప్రీమియంలలో 15 నుంచి 25 శాతం వరకు వ్యత్యాసం ఉంటుంది.

ప్రీమియం తక్కువని 'జోన్ 3' పాలసీ తీసుకుంటే ప్రమాదమే!

చాలామంది చేసే పొరపాటు ఏంటంటే.. తక్కువ ప్రీమియం వస్తుంది కదా అని చిన్న పట్టణానికి సంబంధించిన (Zone 3) పాలసీ తీసుకుంటారు. కానీ, ఏదైనా పెద్ద జబ్బు చేసినప్పుడు మెరుగైన చికిత్స కోసం మెట్రో నగరాల్లోని కార్పొరేట్ ఆసుపత్రులకు వెళ్తే.. అప్పుడు బీమా కంపెనీ అసలు రంగు బయటపడుతుంది. మీరు తక్కువ జోన్ పాలసీ కలిగి ఉండి, ఎక్కువ జోన్ నగరంలో చికిత్స పొందితే 'కో-పేమెంట్' నిబంధన వర్తిస్తుంది. అంటే, ఆసుపత్రి బిల్లులో దాదాపు 20 శాతం మీ సొంత జేబు నుంచే కట్టాల్సి ఉంటుంది. ప్రీమియంలో రూ.4,000 ఆదా చేద్దామనుకుంటే, ఆసుపత్రి బిల్లులో రూ.40,000 మీ నెత్తిన పడుతుందన్నమాట!

చికిత్స ఎక్కడ తీసుకుంటారో ముందే ఆలోచించండి

మీరు ఎక్కడ నివసిస్తున్నారు అనే దానికంటే, అత్యవసర పరిస్థితి వస్తే ఎక్కడ చికిత్స చేయించుకుంటారనేది ముఖ్యం. మీ ఊర్లో సౌకర్యాలు లేక హైదరాబాద్‌కో, బెంగళూరుకో వెళ్లే ఆలోచన ఉంటే.. ముందే 'పాన్-ఇండియా' (Pan-India) కవరేజీ ఉన్న పాలసీని ఎంచుకోవడం తెలివైన పని. ఇది జోన్-ఆధారిత పరిమితులను తొలగించి, దేశంలో ఎక్కడ చికిత్స పొందినా పూర్తి కవరేజీని అందిస్తుంది.

నిపుణుల సలహా: మర్చిపోకుండా ఈ పని చేయండి!

వైద్య ఖర్చులు రాకెట్ వేగంతో పెరుగుతున్న ఈ కాలంలో కనీసం రూ.10 లక్షల నుంచి రూ.20 లక్షల వరకు బీమా కవరేజీ ఉండాలని పాలసీఎక్స్.కామ్ సీఈఓ నవల్ గోయల్ సూచిస్తున్నారు. అన్నింటికంటే ముఖ్యంగా, మీరు ఒక నగరం నుంచి మరో నగరానికి మారినప్పుడు ఆ విషయాన్ని వెంటనే మీ బీమా కంపెనీకి తెలియజేయాలి. నగరం మారిన విషయం చెప్పకపోతే, క్లెయిమ్ సమయంలో కంపెనీలు కోతలు విధిస్తాయి. అందుకే, కేవలం 'చౌక' ప్రీమియం వెంట పడకుండా.. మీ అవసరాలకు తగ్గ 'సరైన' పాలసీని ఎంచుకోండి!

English summary

Choosing health insurance based only on low premiums is a mistake. Insurance companies use zonal pricing where premiums can rise by 50% depending on your city. Learn how moving from a small town to a metro affects your coverage, co-payment risks, and out-of-pocket expenses.