బంపర్ లిస్టింగ్- లాభాలు పంచి పెట్టిన జియో

రిలయన్స్ ఇండస్ట్రీస్ సబ్సిడరీ సంస్థ జియో ప్లాట్‌ఫార్మ్స్ అంచనాలకు తగ్గట్టే సత్తా చాటాయి. స్టాక్ మార్కెట్ లో లాభాలతో లిస్టింగ్ అయ్యాయి. ఈ ఉదయం 21 శాతానికి పైగా లాభాలతో బోంబే స్టాక్ ఎక్స్ఛేంజ్, నేషనల్ స్టాక్ ఎక్స్ఛేంజ్ లల్లో లిస్ట్ అయ్యాయి. గ్రే మార్కెట్ ప్రీమియం అంచనాలకు తగ్గట్టే ఒక్కో షేర్ పై 239 రూపాయల అదనపు మొత్తాన్ని పంచిపెట్టాయి. ట్రేడింగ్ ఆరంభమైన తర్వాత కూడా నిలకడగా కొనసాగాయి. ఒకవంక సెన్సెక్స్ భారీగా పడిపోతోన్నప్పటికీ.. జియో ప్లాట్‌ఫార్మ్స్ షేర్లు స్థిరంగా కనిపించాయి.

జీఎంపీ అంచనాల ప్రకారం.. జియో ప్లాట్ ఫామ్స్ షేర్లు స్టాక్ మార్కెట్ లో రూ.240 వద్ద లిస్ట్ కావాల్సి ఉంది. ఈ మొత్తానికి ఒక్క రూపాయి తక్కువగా అంటే.. రూ. 239 వద్ద లిస్ట్ అయ్యాయి జియో షేర్లు. ఒక్కో షేర్ అప్పర్ ప్రైస్ రూ.1,119. కాగా.. దీనికి 239 రూపాయలు అదనంగా అంటే రూ.1,358 వద్ద స్టాక్ మార్కెట్లో లిస్ట్ అయింది. దాదాపు 21.37 శాతం వరకు లిస్టింగ్ గెయిన్స్ లభించినట్టయింది. టెలికాం, డిజిటల్ రంగంలో తిరుగులేని ఆధిపత్యం, 53.3 కోట్లకు పైగా ఉన్న యూజర్లు, 5జీ నెట్‌వర్క్..జియో ప్లాట్ ఫామ్స్ కు ప్రధాన బలం.

ఒక లాట్ లో 12 షేర్లు ఉంటాయి. ఒక లాట్ కొనడానికి రూ. 13,428 లను కేటాయించాల్సి ఉంటుంది. దీన్ని బట్టి చూస్తే ఒక లాట్ మీద 2,850 రూపాయల లాభం లభించింది.. రిటైల్ ఇన్వెస్టర్లకు. ఈ ఐపీఓలో రిలయన్స్ ఇండస్ట్రీస్ వాటాదారుల కోసం రూ. 2,500 కోట్లు, అర్హులైన కంపెనీ ఉద్యోగుల కోసం రూ. 500 కోట్ల విలువైన షేర్లను ప్రత్యేకంగా కేటాయించింది. ఎంప్లాయిస్ కేటగిరీలో బిడ్ వేసేవారికి ప్రతి షేరుపై రూ. 54 తగ్గింపు లభించింది.

రిటైల్ ఇన్వెస్టర్లు జియో ప్లాట్ ఫామ్స్ షేర్లను దీర్ఘకాలిక లాభాల కోసం హోల్డ్ లో ఉంచవచ్చని ప్రముఖ బ్రోకరేజ్ సంస్థలు సూచిస్తోన్నాయి. ఈ ఐపీఓ ద్వారా వచ్చే మొత్తంతో జియో ప్లాట్‌ఫార్మ్స్ మొత్తం మార్కెట్ క్యాప్ సుమారు రూ. 10.3 లక్షల కోట్లకు చేరుకుంది. ఈ ఐపీఓ ద్వారా సేకరించిన నిధుల సేకరణతో జియో యాజమాన్యం తన మూలధన మొత్తాన్ని మరింత బలోపేతం చేసుకోనుంది. ఐపీఓ ద్వారా లభించే నిధులలో అధిక భాగాన్ని రుణాల చెల్లింపులకే ఉపయోగించనున్నారు.

మొత్తం రూ. 30,213 కోట్లలో దాదాపు 91 శాతం అంటే రూ. 27,500 కోట్లను తన ప్రధాన అనుబంధ సంస్థ రిలయన్స్ జియో ఇన్ఫోకామ్ బకాయిల ప్రీపేమెంట్ లేదా రీపేమెంట్ కోసం కేటాయిస్తారు. మిగిలిన మొత్తాన్ని ఇతర సాధారణ కార్పొరేట్ అవసరాల కోసం వెచ్చిస్తారు. దీనివల్ల కంపెనీపై వడ్డీ భారం తగ్గి లాభాలు మరింత పెరిగే అవకాశం ఉంది.

English summary

Jio Platforms shares made a strong market debut listing at a premium of more than 21 percent Longterm. Jio Platforms shares made a strong market debut on Wednesday, listing at a premium of more than 21 percent after its IPO was subscribed more than 22 times.