క్రెటా, సెల్టోస్‌లకు చుక్కలే! అదిరిపోయే ఫీచర్లతో వస్తున్న కొత్త స్కోడా కుషాక్!!

New Skoda Kushaq Launch: భారతీయ ఎస్‌యూవీ ప్రియులు ఎంతగానో ఎదురుచూస్తున్న స్కోడా కుషాక్ ఫేస్‌లిఫ్ట్ జనవరి 20, 2026న మార్కెట్లోకి విడుదల కానుంది. 2021లో మొదటిసారి లాంచ్ అయిన తర్వాత కుషాక్ పొందుతున్న అతిపెద్ద మేజర్ అప్ డేట్ ఇదే. తాజాగా విడుదలైన టీజర్ ద్వారా ఈ కారు డిజైన్‌లో వచ్చిన మార్పులు స్పష్టంగా కనిపిస్తున్నాయి.

కొత్త డిజైన్ విశేషాలు
టీజర్ ప్రకారం, కొత్త కుషాక్ ముందు, వెనుక భాగాల్లో భారీ మార్పులు జరిగాయి. విమానం ముందు భాగంలో ఒక వైపు నుంచి మరొక వైపు వరకు విస్తరించి ఉండే 'కనెక్టెడ్ LED DRL' బార్‌ను అమర్చారు. ఇది కారుకు మరింత ప్రీమియం లుక్‌ను ఇస్తోంది. DRL బార్ చివర్లలో T-ఆకారంలో ఉండి, పవర్‌ఫుల్ LED హెడ్ ల్యాంప్స్‌తో కూడిన కొత్త ఫేసియాను కలిగి ఉంది. గ్లాసీ బ్లాక్ ఫినిషింగ్‌తో కూడిన సిగ్నేచర్ గ్రిల్, కొత్తగా డిజైన్ చేసిన బంపర్లు కారుకు గంభీరమైన రూపాన్ని ఇస్తున్నాయి. వెనుక భాగంలో కూడా కనెక్టెడ్ LED లైట్ బార్ ఉంది. దీని మధ్యలో 'SKODA' అనే అక్షరాలు ప్రకాశవంతంగా కనిపిస్తాయి. కొత్తగా 'ఆలివ్ గ్రీన్' లేదా డార్క్ గ్రే రంగుల్లో ఈ కారు లభించవచ్చని సమాచారం.

అత్యాధునిక ఫీచర్లు
పోటీని తట్టుకునేలా స్కోడా ఈసారి ఫీచర్ల విషయంలో ఎక్కడా తగ్గలేదు. వినియోగదారుల కోరిక మేరకు ఈసారి పెద్ద పనోరమిక్ సన్‌రూఫ్‌ను జోడించారు.360-డిగ్రీ కెమెరాను కూడా అమర్చారు. పార్కింగ్, ఇరుకైన రోడ్లపై డ్రైవింగ్ సులభతరం చేసేందుకు ఈ ఫీచర్ సహాయపడుతుంది. భద్రత కోసం అడ్వాన్స్‌డ్ డ్రైవర్ అసిస్టెన్స్ సిస్టమ్ (ADAS)ను పరిచయం చేశారు. ఇందులో అడాప్టివ్ క్రూయిజ్ కంట్రోల్, లేన్ కీప్ అసిస్ట్ వంటివి ఉంటాయి. ఈ సెగ్మెంట్‌లో మొదటిసారిగా వెనుక సీట్లకు మసాజ్ ఫంక్షన్‌ను అందించవచ్చని తెలుస్తోంది.

ఇంజిన్, పనితీరు
మెకానికల్ పరంగా పెద్దగా మార్పులు ఉండకపోవచ్చు. ప్రస్తుతం ఉన్న ఇంజిన్ ఆప్షన్లే కొనసాగుతాయి. ఈ ఇంజిన్లు తక్కువ ఇంధనంతో ఎక్కువ పవర్ ఇవ్వడంలో పేరుగాంచాయి.

*1.0L TSI పెట్రోల్ (3-సిలిండర్): ఇది 115 PS శక్తిని, 178 Nm టార్క్‌ను విడుదల చేస్తుంది. నగర ప్రయాణాలకు, మైలేజీ కోరుకునే వారికి ఇది సరైన ఎంపిక.

*1.5L TSI పెట్రోల్ (4-సిలిండర్): ఇది 150 PS శక్తిని, 250 Nm టార్క్‌ను అందిస్తుంది. హైవేలపై వేగంగా వెళ్లాలనుకునే వారికి, పవర్‌ఫుల్ డ్రైవింగ్ ఇష్టపడే వారికి ఇది బెస్ట్. ఇందులో 'యాక్టివ్ సిలిండర్ టెక్నాలజీ (ACT)' ఉంటుంది, ఇది అవసరం లేనప్పుడు రెండు సిలిండర్లను ఆపివేసి మైలేజీని పెంచుతుంది.

గేర్‌బాక్స్: సరికొత్త 8-స్పీడ్ ఆటోమేటిక్ రాబోతోందా?
ప్రస్తుతం ఉన్న 6-స్పీడ్ మాన్యువల్, ఆటోమేటిక్ గేర్‌బాక్స్‌లతో పాటు, ఈసారి స్కోడా ఒక సర్ప్రైజ్ ఇచ్చే అవకాశం ఉంది. 1.0L ఇంజిన్ కోసం ఇప్పటివరకు ఉన్న 6-స్పీడ్ టార్క్ కన్వర్టర్ స్థానంలో, కొత్త 8-స్పీడ్ ఆటోమేటిక్ గేర్‌బాక్స్‌ను ప్రవేశపెట్టవచ్చని సమాచారం. దీనివల్ల గేర్ షిఫ్టింగ్ మరింత స్మూత్‌గా ఉండటమే కాకుండా, ఇంధన సామర్థ్యం (Mileage) కూడా పెరుగుతుంది. 1.5L ఇంజిన్ కోసం స్కోడా ఐకానిక్ 7-స్పీడ్ DSG (Direct-Shift Gearbox) ఆటోమేటిక్ సిస్టమ్ అందుబాటులో ఉంటుంది. ఇది మెరుపు వేగంతో గేర్లను మారుస్తూ స్పోర్ట్స్ కార్ అనుభూతిని ఇస్తుంది.

ధర అంచనా
కొత్త స్కోడా కుషాక్ ఫేస్‌లిఫ్ట్ ధర రూ. 11 లక్షల నుంచి రూ. 20 లక్షల (ఎక్స్-షోరూమ్) మధ్యలో ఉండే అవకాశం ఉంది. ఇది హ్యుందాయ్ క్రెటా, కియా సెల్టోస్, మారుతి గ్రాండ్ విటారా వంటి కార్లకు గట్టి పోటీ ఇవ్వనుంది.

English summary

Skoda is set to launch the all-new Kushaq Facelift on January 20, 2026. With connected LED DRLs, panoramic sunroof, ADAS, 360-degree camera and powerful TSI engines, it aims to challenge Creta and Seltos.