భారత ఆటోమొబైల్ మార్కెట్లోకి టయోటా కొత్త బాహుబలి: టీజర్ అదిరిపోయిందిగా!

Toyota Hilux: భారతీయ ఆటోమొబైల్ ప్రేమికులకు ప్రముఖ కార్ల తయారీ సంస్థ టయోటా అదిరిపోయే అప్‌డేట్ ఇచ్చింది. టయోటా తన మోస్ట్ పాపులర్ పికప్ ట్రక్ 'టయోటా హిలక్స్' కొత్త వెర్షన్‌ను భారత మార్కెట్లో విడుదల చేసేందుకు సర్వం సిద్ధం చేసింది. ఈ రాబోయే పికప్ ట్రక్కుకు సంబంధించి కంపెనీ ఓ టీజర్‌ను విడుదల చేసింది. కొత్త హైలక్స్ ఇప్పటికే ప్రపంచ మార్కెట్లలో విడుదలైంది. కంపెనీ ఈ పికప్ ట్రక్కును అదే డిజైన్‌తో భారతదేశంలో విడుదల చేయనుంది. రాబోయే టయోటా హిలక్స్‌లో ఏమేమి విశేషాలు ఉన్నాయో తెలుసుకుందాం.

టయోట కంపెనీకి చెందిన ఈ పికప్ ట్రక్ జులై 28న ఇండియాలో విడుదల కానుంది. రాబోయే హైలక్స్ ట్రక్ మునుపటి తరం మోడల్ మాదిరిగానే అదే బాడీ-ఆన్-ఫ్రేమ్ IMV ప్లాట్ ఫారమ్‌పైనే ఆధారపడి ఉంటుంది. టయోటా విడుదల చేసిన టీజర్‌లో ఈ పికప్ ట్రక్ ప్రాథమిక డిజైన్‌ను చూపించింది. దీని డిజైన్ కొంతకాలంగా వస్తున్న వార్తలకు పొంతన లేకుండా చాలా బోల్డ్, మోడరన్ లుక్ ను కలిగి ఉండబోతోంది. ముఖ్యంగా బ్రాంజ్ కలర్ వేరియంట్ ను కంపెనీ టీజర్లో చూపించింది. దీని ఫ్రంట్ డిజైన్ పూర్తిగా మారిపోయింది. ఇందులో సిల్వర్ స్కిడ్ ప్లేట్, హనీకోంబ్ సెంటర్ గ్రిల్, టయోటా అక్షరాలు ఉంటాయి. ఎల్ఈడీ లైట్ల మధ్య TOYOTA అనే ​​అక్షరాలతో కూడిన ఒక నల్లని ప్యానెల్ ఉంచబడుతుంది.

అదనంగా ఈ పికప్ ట్రక్కులో నలుపు రంగు రిమ్స్, వీల్ ఆర్చ్‌లు, ప్రధాన క్యాబిన్ వెనుక రోల్ బార్‌లు, షార్క్-ఫిన్ యాంటెన్నా ఉంటాయి. కంపెనీ టీజర్‌లో హైలక్స్ వెనుక డిజైన్‌ను వెల్లడించలేదు. అంతర్జాతీయ వేరియంట్‌లో వెనుక భాగంలో HiLux అనే అక్షరాలు కూడా ఉంటాయి. ఇందులో LED DRLలు, నిలువు టెయిల్‌లైట్లు కూడా ఉన్నాయి. భారత మార్కెట్ కోసం టయోటా హైలక్స్ ఇంటీరియర్‌ను ఇంకా వెల్లడించలేదు. ఈ పికప్ ట్రక్కు డబుల్ క్యాబ్ కాన్ఫిగరేషన్‌తో వస్తుందని భావిస్తున్నారు. క్యాబిన్‌లో లెదర్ స్టీరింగ్ వీల్, 12.3-అంగుళాల డ్యూయల్-స్క్రీన్ డిస్‌ప్లేలు కూడా ఉంటాయని అంచనా. ఈ కారు టయోటా స్మార్ట్ కనెక్ట్ సిస్టమ్, డాష్-మౌంటెడ్ ఇన్ఫోటైన్‌మెంట్ సిస్టమ్‌తో వస్తుంది.

ఇంజిన్, శక్తి, ధర
కొత్త టయోటా హైలక్స్ ప్రస్తుతమున్న ఇంజన్, గేర్‌బాక్స్ ఆప్షన్‌లను కొనసాగిస్తుంది. ప్రస్తుతం ఈ పికప్ ట్రక్ 2.8-లీటర్ ఫోర్-సిలిండర్ డీజిల్ ఇంజన్‌తో వస్తుంది, ఇది వరుసగా 204 hp, 420 Nm, 500 Nm టార్క్‌ను ఉత్పత్తి చేస్తుంది. 500 Nm టార్క్ 6-స్పీడ్ ఆటోమేటిక్‌తో, 420 Nm టార్క్ 6-స్పీడ్ మాన్యువల్‌తో అందుబాటులో ఉంటాయి. అంతర్జాతీయ మార్కెట్లలో టయోటా హైలక్స్ జనరేటివ్ బ్రేకింగ్ ఫంక్షన్‌తో కూడిన 48V మైల్డ్-హైబ్రిడ్ సిస్టమ్‌తో వస్తుంది. రాబోయే హైలక్స్ ప్రస్తుత వెర్షన్ కంటే అధిక ధరతో రానుంది. ప్రస్తుతం ఇండియాలో ఈ పికప్ ట్రక్ ధరలు రూ.28.52 లక్షల నుండి ప్రారంభమై రూ.36 లక్షల వరకు (ఎక్స్-షోరూమ్, ఢిల్లీ) ఉన్నాయి.

English summary

Next-Generation Toyota Hilux Pickup Truck in India. Toyota Drops the First Official teaser. Discover its expected launch date, features and Powertrains Specifications.