Tata-MGలకు షాక్!: చౌకగా ఎలక్ట్రిక్ కారును తెస్తున్న ఓలా!

ఎలక్ట్రిక్ టూ-వీలర్ విభాగంలో కొంతకాలంగా సవాళ్లను ఎదుర్కొంటున్న ఓలా ఎలక్ట్రిక్.. వాటిని అధిగమించేందుకు వినూత్న ప్రణాళికలతో ముందుకు వస్తోంది. మాస్ మార్కెట్ స్కూటర్లపై దృష్టి సారించడంతో తాత్కాలికంగా నిలిపివేసిన ఎలక్ట్రిక్ కార్ల ప్రాజెక్టును ఇప్పుడు తిరిగి ప్రారంభించింది. ఈ క్రమంలో ఓలా ఒక చిన్నపాటి ఎలక్ట్రిక్ కారు కోసం పేటెంట్ దరఖాస్తు చేసింది. ఈ కొత్త చిన్న ఈవీ, భారత మార్కెట్‌లో ఇప్పటికే ఉన్న టాటా టియాగో ఈవీ, ఎంజీ కామెట్ ఈవీ వంటి మోడళ్లకు గట్టి పోటీనిచ్చే అవకాశం ఉంది.

గతంలో నెలవారీ 50 వేలకు పైగా స్కూటర్లు అమ్మి అగ్రస్థానంలో ఉన్న ఓలా ఎలక్ట్రిక్.. ప్రస్తుతం అమ్మకాలు తగ్గి నాలుగో స్థానంలో కొనసాగుతోంది. టీవీఎస్, బజాజ్, ఏథర్ వంటి కంపెనీలు ఇప్పుడు ఓలా కంటే ముందంజలో ఉన్నాయి. అమ్మకాలు పెరిగినప్పుడు సరైన అమ్మకాల అనంతర సేవలను అందించకపోవడం వల్ల కస్టమర్ల విశ్వసనీయత తగ్గింది. ఇది అమ్మకాల పతనానికి ప్రధాన కారణం. ఈ ప్రతికూలతలను అధిగమించడానికి ఓలా తన ఎలక్ట్రిక్ కార్ల ప్రాజెక్ట్‌ను తిరిగి ప్రారంభించి, ఎలక్ట్రిక్ ఫోర్-వీలర్ సెగ్మెంట్‌లోకి ప్రవేశించే ప్రయత్నాలను వేగవంతం చేసింది. తాజా పేటెంట్ దరఖాస్తు చిత్రాల్లో ఈ మోడల్ 5-డోర్ల హ్యాచ్‌బ్యాక్ కారుగా కనిపిస్తోంది.

ఈ కాంపాక్ట్ కారు టాటా టియాగో ఈవీ, ఎంజీ కామెట్ ఈవీ వంటి ప్రముఖ మోడళ్లకు, అలాగే విన్‌ఫాస్ట్ మినియో గ్రీన్ వంటి రాబోయే మోడళ్లకు కూడా పోటీనివ్వగలదు. ఓలా ఇటీవల ఆగస్టులో నిర్వహించిన 'సంకల్ప్ 2025' ఈవెంట్‌లో తమ జెన్ 4 మోడ్యులర్ ప్లాట్‌ఫామ్‌ను ప్రదర్శించింది. ఈ ప్లాట్‌ఫామ్ స్కూటర్లు, త్రీ-వీలర్లు, కార్లు వంటి వివిధ వాహనాల తయారీకి అనుకూలంగా రూపొందించబడింది. భారతీయ ఈవీ మార్కెట్‌లో స్థానికంగా తయారైన బ్యాటరీ సెల్స్ కొరత ఒక సమస్య. ఓలా ఈ సమస్యకు పరిష్కారం చూపగలదని సూచనలు ఉన్నాయి. సంకల్ప్ ఈవెంట్‌లో ఓలా స్థానికంగా తయారైన 4680 సిరీస్ సెల్స్‌ను ప్రదర్శించింది. ఇవి నికెల్, మాంగనీస్, కోబాల్ట్ (NMC) కాంపోనెంట్‌లను కలిగి ఉండే అవకాశం ఉంది. ఈ సెల్స్ లభ్యత ఈవీ తయారీలో కీలక పాత్ర పోషిస్తుంది.

ప్రస్తుతం రూ. 10 లక్షల కంటే తక్కువ ధరలో టియాగో ఈవీ, ఎంజీ కామెట్ ఈవీలు ప్రధానంగా ఉన్నాయి. ఓలా ఈ విభాగంలో తక్కువ ధరలో కారును తీసుకురాగలిగితే దేశంలో ఎలక్ట్రిక్ కార్లు మరింత ప్రాచుర్యం పొందే అవకాశం ఉంది. S1 సిరీస్ స్కూటర్లతో ఎలక్ట్రిక్ టూ వీలర్ మార్కెట్‌లో సంచలనం సృష్టించిన ఓలాకు, అమ్మకాలు పెరిగినప్పుడు అమ్మకాల తర్వాత సేవల లోపాలు ప్రతికూలంగా మారాయి. ఈ సమస్యలు కాలక్రమేణా పరిష్కరించబడినప్పటికీ, వినియోగదారుల విశ్వాసాన్ని తిరిగి పొందడానికి ఓలాకు ఇంకా సమయం పడుతుంది.

విన్‌ఫాస్ట్ ఎలక్ట్రిక్ ఫోర్-వీలర్ విభాగంలోకి ప్రవేశించి ఇప్పటికే పేటెంట్ పొందిన మినియో గ్రీన్ మోడల్‌ను విడుదల చేస్తే.. ఓలాకు పోటీ తీవ్రంగా ఉండవచ్చు. వియత్నామీస్ బ్రాండ్ తమిళనాడులోని తూత్తుక్కుడి ప్లాంట్‌లో ఈవీలను తయారు చేస్తున్నందున వాటిని పోటీ ధరలో అందించగలదు. ఎలక్ట్రిక్ స్కూటర్లను ప్రజాదరణ పొందేలా చేసిన విధంగానే ఓలా ఎలక్ట్రిక్ కార్లను కూడా దేశంలో విస్తృతం చేస్తుందని ఆశించవచ్చు.

English summary

Ola Electric is making a comeback with a new affordable electric car project. The upcoming compact EV aims to rival Tata Tiago EV, MG Comet EV, and VinFast models under Rs.10 lakh.