1986లో రాయల్ ఎన్ఫీల్డ్ బుల్లెట్ ధర ఎంత?: పాత బిల్లు వైరల్!
Royal Enfield: రాయల్ ఎన్ఫీల్డ్ బుల్లెట్ 350 బైక్కు సంబంధించిన 39 ఏళ్ల నాటి పాత బిల్లు ఒకటి సోషల్ మీడియాలో వైరల్ అవుతోంది. దాదాపు 39 ఏళ్ల క్రితం.. అంటే 1986లో ఈ బుల్లెట్ మోడల్ ధర ఎంత ఉండేదో ఈ బిల్లు తెలియజేస్తుంది. ఈ పాత బిల్లును చూసి నేటి తరం నెటిజన్లు ఆశ్చర్యపోతున్నారు. పాత తరం వారు తమ జ్ఞాపకాలను నెమరువేసుకుంటున్నారు. సోషల్ మీడియాలో వైరలవుతున్న ఈ బిల్లు బెంగళూరులోని మద్రాస్ మోటార్స్ లిమిటెడ్ జారీ చేసింది. ఫిబ్రవరి 1, 1986 తేదీ గల ఈ బిల్లులో బుల్లెట్ ధర కేవలం రూ.18,824.30గా నమోదు చేయబడింది.
స్టేటస్ సింబల్గా బుల్లెట్
ఇది ప్రస్తుతం బుల్లెట్ 350(బేస్ మోడల్) ఎక్స్-షోరూమ్ ప్రారంభ ధర దాదాపు రూ.1.60 లక్షలతో పోలిస్తే దాదాపు 9 రెట్లు తక్కువ. కేవలం 40 ఏళ్ల కాలంలో ఓ వాహనం ధరలో ఇంత భారీ మార్పు రావడంతో ప్రపంచం ఎంత వేగంగా మారిందో ఈ బిల్లు కళ్లకు కట్టినట్లు చూపిస్తుంది. 1980వ దశకంలో బుల్లెట్ ధర రూ.16 వేలు లేదా రూ.18 వేలు ఉన్నప్పటికీ ఆ రోజుల్లో అది చాలా పెద్ద మొత్తం. ఆ సమయంలో దేశంలో కొద్ది మందికి మాత్రమే బుల్లెట్ కొనుగోలు చేసే స్థోమత ఉండేది. అందుకే బుల్లెట్ అనేది కేవలం ఒక మోటార్సైకిల్ మాత్రమే కాదు.. ఇండియా అది ఓ ఎమోషన్, స్టేటస్ సింబల్. ఈ బిల్లు చూసిన పాత తరం బుల్లెట్ ప్రేమికులు తమ అనుభవాలను పంచుకుంటూ, "నా వద్ద 1984 మోడల్ ఉంది. దాని ధర రూ.16,100.. 41 సంవత్సరాల తర్వాత కూడా అది నా తోడుగా ఉంది" అని తమ జ్ఞాపకాలను పంచుకుంటున్నారు. ఈ పాత బిల్లు కేవలం ధరల పెరుగుదలను మాత్రమే కాదు.. భారత మార్కెట్లో మోటార్ సైకిల్ హోదా చిహ్నంగా ఎలా మారిందో కూడా తెలియజేస్తుంది.
కాలంతో పాటు మారిన బుల్లెట్
రాయల్ ఎన్ఫీల్డ్ బుల్లెట్ తన నాణ్యత, నమ్మదగిన ఇంజన్, ప్రత్యేకమైన "థంబ్" శబ్దంతో ఎప్పుడూ ప్రజల హృదయాల్లో స్థానం సంపాదించింది. నేటికీ కొత్త బుల్లెట్ 350 దాని పాత గుర్తింపును నిలబెట్టుకుంటూనే, ఆధునిక ఫీచర్లు, మెరుగైన భద్రతా ప్రమాణాలు, అధునాతన ఇంజిన్ సాంకేతికతతో మెరుగుపడింది. బుల్లెట్ ఇప్పుడు 650 సీసీ ఇంజిన్తో కూడా అందుబాటులో ఉంది. ఈ వైరల్ అవుతున్న పాత బిల్లు ఆటోమొబైల్ పరిశ్రమ, భారతీయ ఆర్థిక వ్యవస్థ ప్రయాణాన్ని గుర్తుచేసే ఒక మధురమైన జ్ఞాపకంగా నిలిచింది.
Click it and Unblock the Notifications
Sign in with Google