8 వేల మంది ఇంటికే! టెక్ ప్రపంచానికి మెటా షాక్.

టెక్ దిగ్గజం మెటా తన ఉద్యోగులకు మరోసారి గట్టి షాక్ ఇచ్చింది. నిర్వహణ సామర్థ్యాన్ని పెంచుకోవడంతో పాటు, కృత్రిమ మేధస్సు (AI) రంగంలో అగ్రగామిగా నిలవాలనే లక్ష్యంతో ఏకంగా 16,000 మంది ఉద్యోగులను తొలగించేందుకు సిద్ధమైంది. రాయిటర్స్ నివేదిక ప్రకారం, ఈ భారీ ఉద్వాసన ప్రక్రియ వచ్చే నెల నుంచే ప్రారంభం కానుంది. ఇది మెటా యొక్క గ్లోబల్ వర్క్‌ఫోర్స్‌లో దాదాపు 10 శాతానికి సమానం కావడం గమనార్హం.

ఈ ఉద్యోగ కోతల పర్వం మే 20న ప్రారంభం కానుంది. మొదటి దశలోనే సుమారు 8,000 మంది ఉద్యోగులపై ప్రభావం పడనుంది. 2026 చివరి నాటికి మొత్తం 16,000 మందిని తొలగించాలని కంపెనీ భావిస్తోంది. గతంలో 2022-23 మధ్య కాలంలో మెటా ఇప్పటికే 21,000 మందిని తొలగించింది. ఆ కాలాన్ని మార్క్ జుకర్‌బర్గ్ "సమర్థత సంవత్సరం (year of efficiency)"గా అభివర్ణించగా, తాజా కోతలు కంపెనీని పూర్తిగా 'ఏఐ ఆధారిత సంస్థ'గా మార్చే ప్రక్రియలో భాగమని తెలుస్తోంది.

$135 బిలియన్ల 'ఏఐ' ప్లాన్.. చిప్‌లు, డేటా సెంటర్లే లక్ష్యం

ఉద్యోగులను తొలగిస్తున్నప్పటికీ, పెట్టుబడుల విషయంలో మాత్రం మెటా వెనక్కి తగ్గడం లేదు. ఈ ఏడాది కృత్రిమ మేధస్సు విస్తరణ కోసం సుమారు $135 బిలియన్ల (దాదాపు ₹11 లక్షల కోట్లు) భారీ మూలధన వ్యయాన్ని కేటాయిస్తోంది. జనరేటివ్ ఏఐ టూల్స్, మెషిన్ లెర్నింగ్ సిస్టమ్స్, అధునాతన చిప్‌లు మరియు భారీ డేటా సెంటర్ల నిర్మాణానికి ఈ నిధులను వెచ్చించనుంది. అంటే, మనుషుల కంటే యంత్రాల తెలివితేటలకే మెటా ఎక్కువ ప్రాధాన్యత ఇస్తోందని స్పష్టమవుతోంది.

టెక్ రంగమంతా ఇదే బాట.. 73,000 మందికి పైగా ఉద్వాసన

కేవలం మెటా మాత్రమే కాదు, గూగుల్, అమెజాన్ వంటి దిగ్గజాలు కూడా ఇదే దారిలో నడుస్తున్నాయి. ఇటీవలే అమెజాన్ తన కార్పొరేట్ విభాగంలో 30,000 మందిని (10%) తొలగించింది. Layoffs.fyi గణాంకాల ప్రకారం, 2026లో ఇప్పటివరకు ప్రపంచవ్యాప్తంగా 95 కంపెనీలు సుమారు 73,000 మంది సాంకేతిక ఉద్యోగులకు ఉద్వాసన పలికాయి. టెక్ కంపెనీలు ఇప్పుడు 'సాధారణ సాఫ్ట్‌వేర్ ఇంజనీర్ల' కంటే 'ఏఐ స్పెషలిస్టుల' కోసం, స్వయంప్రతిపత్త వ్యవస్థల (Autonomous Systems) కోసం వేట మొదలుపెట్టాయి.

ఉద్యోగుల పునర్వ్యవస్థీకరణ

ప్రస్తుతం మెటా తన ఇంటర్నల్ టీమ్స్ ను ఏఐ ప్రాధాన్యతలకు అనుగుణంగా మారుస్తోంది. సాధారణ కోడింగ్ చేసే ఇంజనీర్లను పక్కన పెట్టి, క్లిష్టమైన పనులను నిర్వహించగల స్వయంప్రతిపత్త వ్యవస్థల ప్రాజెక్టులకు నిపుణులను కేటాయిస్తోంది. ఏఐ ఉత్పత్తుల విడుదలను వేగవంతం చేయడానికి ప్రత్యేక విభాగాలను కూడా సృష్టించింది. ఈ పరిణామాలు టెక్ రంగంలో కొత్త నైపుణ్యాల అవసరాన్ని నొక్కి చెబుతున్నాయి.

English summary

Meta announces another round of layoffs, affecting 16,000 employees as it prioritizes AI development. Learn about Mark Zuckerberg's $135B investment plan and the global tech job market trends in 2026.