UPI Down: దేశవ్యాప్తంగా స్తంభించిన పేటీఎం, ఫోన్‌పే, గూగుల్ పే సేవలు.. వినియోగదారుల్లో గందరగోళం!

దేశం మొత్తం డిజిటల్ చెల్లింపులపై ఆధారపడిన వేళ, ఊహించని విధంగా UPI సేవలు స్తంభించిపోయాయి. శనివారం, ఏప్రిల్ 12, 2025న, యూనిఫైడ్ పేమెంట్స్ ఇంటర్‌ఫేస్ (UPI)లో భారీ అంతరాయం ఏర్పడటంతో లక్షలాది మంది వినియోగదారులు తీవ్ర ఇబ్బందులు ఎదుర్కొన్నారు. పేటీఎం, ఫోన్‌పే, గూగుల్ పే వంటి ప్రముఖ యాప్‌లు పనిచేయకపోవడంతో సామాజిక మాధ్యమాలు ఫిర్యాదులతో నిండిపోయాయి.

చిన్న కిరాణా కొనుగోళ్ల నుండి పెద్ద మొత్తాల బదిలీ వరకు UPI చెల్లింపులపై ఆధారపడే వారికి తీవ్ర సమస్యలు ఎదురవుతున్నాయి. దుకాణాల్లో సరుకులు కొనుక్కోవాలన్నా, బిల్లులు చెల్లించాలన్నా, డబ్బులు పంపించాలన్నా UPI ఒక్కటే మార్గంగా ఉన్నవారికి ఏం చేయాలో పాలుపోలేదు. దీంతో దేశవ్యాప్తంగా గందరగోళ పరిస్థితులు నెలకొన్నాయి.

ఫిర్యాదుల వెల్లువ
UPI సేవలు నిలిచిపోవడంతో ఫిర్యాదులు వెల్లువెత్తాయి. ఈ అంతరాయం ఒక బ్యాంకుకు లేదా ఒక యాప్‌కు పరిమితం కాకుండా అన్ని బ్యాంకులకు, అన్ని ప్లాట్‌ఫామ్‌లకు విస్తరించింది. ఇది UPI వ్యవస్థలోనే ఏదో పెద్ద లోపం జరిగిందని స్పష్టం చేస్తోంది.

UPI అంటే యూనిఫైడ్ పేమెంట్స్ ఇంటర్‌ఫేస్. ఇది నేషనల్ పేమెంట్స్ కార్పొరేషన్ ఆఫ్ ఇండియా (NPCI) అభివృద్ధి చేసిన తక్షణ చెల్లింపు వ్యవస్థ. రిజర్వ్ బ్యాంక్ ఆఫ్ ఇండియా (RBI) పర్యవేక్షణలో పనిచేసే NPCI, మొబైల్ యాప్‌ల ద్వారా బ్యాంకు ఖాతాల మధ్య తక్షణ నగదు బదిలీని సులభతరం చేస్తుంది. NPCI ఛార్జీలు లేకుండా ఈ సేవలను అందిస్తుంది. UPI చిన్న కిరాణా బిల్లుల నుండి పెద్ద మొత్తాల వరకు అన్ని రకాల చెల్లింపులకు విస్తృతంగా వాడుకలో ఉంది. ఆటోపే ఫీచర్ ద్వారా బిల్లులు, సబ్‌స్క్రిప్షన్‌లు, ఇతర పునరావృత చెల్లింపులను ఆటోమేట్ చేయడానికి కూడా ఇది ఉపయోగపడుతుంది.

అయితే UPI సేవలు నిలిచిపోవడానికి గల కారణం ఇంకా తెలియరాలేదు. NPCI లేదా ప్రధాన UPI ప్లాట్‌ఫామ్‌ల నుండి దీనిపై ఇంకా ఎలాంటి అధికారిక ప్రకటన వెలువడలేదు. వినియోగదారులు సేవలు పూర్తిగా పునరుద్ధరించే వరకు ప్రత్యామ్నాయ చెల్లింపు పద్ధతులను అందుబాటులో ఉంచుకోవాలని సూచించబడింది. UPI సేవలు ఎప్పుడు తిరిగి అందుబాటులోకి వస్తాయో వేచి చూడాలి. అప్పటి వరకు డిజిటల్ చెల్లింపులు ఆగిపోవడంతో ప్రజలు తీవ్ర అసౌకర్యానికి గురవుతున్నారు.

English summary

At a time when the entire country is relying on digital payments, UPI services have unexpectedly come to a standstill. On Saturday, April 12, 2025, a massive outage in the Unified Payments Interface (UPI) left millions of users facing severe difficulties.