కులాంతర వివాహం చేసుకున్నందుకు 40 మందికి శిరోముండనం, గ్రామ బహిష్కరణ

రోజులు మారుతున్నాయి, ప్రజలు మారుతున్నారు. కాలానుగుణంగా అభివృద్ధి వైపు ప్రపంచం పరుగులు పెడుతుంది. గ్లోబలైజేషన్ అంటూ తన మన భేదం లేకుండా కొన్ని దేశాలు మినహా మిగతా దేశాలన్నీ స్నేహభావం తోనే ముందుకు వెళ్తున్నాయి. ఇంతా జరుగుతున్నా కూడా భారత్ లో మాత్రం కులం అనే అడ్డుగోడల్ని మాత్రం చెరపలేకపోతున్నారు. కులం అనే గుడ్డితనంలో ఉండిపోయిన కొందరు పలు అవమానీయ ఘటనలకు పాల్పడడం సర్వత్రా చర్చనీయాంశంగా మారుతోంది.

కులాంతర వివాహం నేపధ్యంలో ఇప్పటి వరకు ఎన్నో పరువు హత్యలు జరిగిన విషయం తెలిసిందే. కానీ ఇప్పుడు ఈ తరహా లోనే మరో అవమానీయ ఘటన చోటు చేసుకుంది. కులాంతర వివాహం చేసుకుందని.. యువతి తరపు వారిలో 40 మందికి గుండు గీయించడమే కాకుండా.. బ్రతికి ఉండగానే పెళ్లి చేసుకున్న జంటకు పెద్దకర్మ సైతం జరిపించడం దేశవ్యాప్తంగా సంచలనంగా మారింది. ఈ ఘటనకు సంబంధించి పూర్తి వివరాల్లోకి వెళ్తే..

ఒడిశాలోని రాయగడ జిల్లా గోరఖ్‌పూర్‌ పంచాయతీలోని ఓ గ్రామానికి చెందిన ఆదివాసీ అమ్మాయి.. షెడ్యూల్డ్‌ కులానికి చెందిన అబ్బాయిని ప్రేమించింది. అయితే యువతి తరఫు వారు ఈ వివాహానికి అంగీకరించలేదు. దీంతో వారిద్దరూ మూడు రోజుల క్రితం లేచిపోయి పెళ్లి చేసుకున్నారు. ఈ క్రమంలోనే గురువారం నాడు ఆ జంట గ్రామానికి రావడంతో విషయం తెలిసిన పెద్దలు గ్రామ కట్టుబాట్ల ప్రకారం యువతి ఫ్యామిలీ సభ్యులను గ్రామ బహిష్కరణ చేశారు.

గ్రామంలో నుంచి వెలివేయకుండా ఉండాలంటే.. గుండు చేసుకుని, మూగ జీవాలను బలిచ్చి, కొత్త జంటకు పెద్ద కర్మ చేయాలని గ్రామ పెద్దలు ఆదేశించారు. దీంతో యువతి తరపు కుటుంబ సభ్యులతో పాటు బంధువుల్లో 40 మంది పురుషులు గుండు చేయించుకున్నారు. అలానే స్థానిక ఆలయంలో మేక, గొర్రె, కోడి, పావురాలను బలి ఇచ్చి ప్రత్యేక పూజలు నిర్వహించారు. అంతే కాకుండా పెళ్లి చేసుకున్న నవ దంపతులకు పెద్దకర్మ కూడా జరిపించారు. ఈ ఘటనపై స్పందించిన పోలీసులు, తమకు ఎలాంటి సమాచారం అందలేదని పేర్కొన్నారు.

English summary

incident of an inter-caste marriage, in which 40 of the young woman's relatives were not only shaved, but also a large ritual was performed on the couple who had married while they were still alive, became a sensation across the country.