నిర్మాణంలో ఉన్న భవనం స్లాబ్ కూలి ఆరుగురు మృతి, పలువురికి గాయాలు

పుణె: మహారాష్ట్రలోని పుణెలో ఘోర ప్రమాదం చోటు చేసుకుంది. గురువారం అర్థరాత్రి ఎరవాడ ప్రాంతంలో నిర్మాణంలో ఉన్న భవనానికి స్లాబ్‌ వేయడానికి నిర్మించిన నిర్మాణం కూలిపోవడంతో ఆరుగురు మృతి చెందగా, మరో ఐదుగురు తీవ్రంగా గాయపడ్డారు. మృతులు, గాయపడిన బాధితులు నిర్మాణ స్థలంలో పనిచేస్తున్నారని పోలీసులు తెలిపారు.

ఈ సంఘటన గురువారం రాత్రి 11 గంటలకు ఎరవాడ ప్రాంతంలోని లేన్ నంబర్ 8 లో చోటు చేసుకుంది. భవన శిథిలాల్లో చిక్కుకున్న వ్యక్తులను రక్షించడానికి స్థానికులు అనేకమంది సంఘటనా స్థలానికి చేరుకున్నారు. అనంతరం స్థానిక పోలీసులు, అగ్నిమాపక దళ సిబ్బంది సహాయక చర్యలు వేగంగా చేపట్టారు.

డిప్యూటీ కమిషనర్ ఆఫ్ పోలీస్ (జోన్ 4), రోహిదాస్ పవార్ మాట్లాడుతూ... 'ఇది నిర్మాణంలో ఉన్న భవనం, నేలమాళిగ కోసం స్లాబ్ వేయడానికి ఒక నిర్మాణం నిర్మించబడింది. రాత్రి 11 గంటల ఆ ప్రాంతంలో నిర్మాణం కూలిపోయింది. ప్రమాదం జరిగిన సమయంలో పలువురు కార్మికులు ఘటనా స్థలంలో ఉన్నారు. ప్రాథమిక నివేదికల ప్రకారం ఆరుగురు వ్యక్తులు మరణించారు, మరో ఐదుగురు గాయపడ్డారు. క్షతగాత్రులందరినీ చికిత్స నిమిత్తం ఆస్పత్రికి తరలించారు.

మరో పోలీసు అధికారి మాట్లాడుతూ.. స్లాబ్‌ వేసే ప్రక్రియ కొనసాగుతున్న సమయంలో ఈ ఘటన చోటుచేసుకుందని, ప్రమాదానికి దారితీసిన సంఘటనలపై విచారణ నిర్వహిస్తామని అధికారి తెలిపారు.

స్లాబ్‌ కూలిన ఘటనలో మృతులకు ప్రధాని నరేంద్ర మోడీ సంతాపం తెలిపారు. "పుణెలో నిర్మాణంలో ఉన్న భవనంలో జరిగిన దుర్ఘటన బాధ కలిగించింది. మృతుల కుటుంబాలకు సంతాపం తెలిపారు. ప్రమాదంలో గాయపడిన వారంతా త్వరగా కోలుకోవాలని ఆశిస్తున్నాను' అని ప్రధాని నరేంద్ర మోడీ ట్వీట్ చేశారు.

గత ఏడాది అక్టోబరులో పుణెలో జరిగిన ఇలాంటి సంఘటనలో, బాలేవాడిలోని నివాస భవనాల ప్రాజెక్ట్ వద్ద నిర్మాణంలో ఉన్న స్లాబ్, దానిని నిలబెట్టే నిర్మాణం కూలిపోవడంతో ఎనిమిది మంది కార్మికులు గాయపడ్డారు.

English summary

6 dead and 5 injured as slab structure collapses at building construction site in Pune.